Bir kunda 6 yangi hokim. Toshkentning yana bir tumanida o‘zgarish bo‘lgan

O‘zbekiston poytaxti Toshkent shahrida tuman hokimiyatlari rahbarlarini yangilash jarayoni davom etmoqda. 18 aprel kuni avvalida Yunusobod va Chilonzor tumanlariga yangi hokim tayinlangani ma'lum bo‘lgan edi. Yunusobodga Tabiatni muhofaza qilish davlat qo‘mitasining sobiq raisi Baxtiyor Abdusamatov, Chilonzorga Davlat raqobat qo‘mitasi sobiq rahbari Davron Hidoyatov hokim etib tayinlangandi.

Hayfsan olgan qo‘mita rahbari tuman hokimligiga tushirildi

Kun oxiriga qadar yana 4ta tumanda (poytaxtda jami 11ta tuman mavjud) — Mirobod, Yashnobod, Uchtepa va Sergeli tumanlarida ham rahbarlar  o‘zgartirildi.

Davlat qo‘mitasidan tumanga. Chilonzorga yangi hokim tayinlandi

Sergeli tumaniga bunga qadar Toshkent shahar hokimining sanoatni rivojlantirish, kapital qurilish, kommunikatsiya va kommunal xo‘jalik masalalari bo‘yicha o‘rinbosari sifatida ishlagan Baxtiyor Rahmonov hokim bo‘ldi. Sergeli tumanining avvalgi hokimi Furqat Maqsudxo‘jayev qaysi ishga o‘tgani haqida hozircha ma'lumot yo‘q.

Yashnobod tumaniga bunga qadar O‘zbekiston iqtisodiyot vaziri o‘rinbosari lavozimida faoliyat ko‘rsatgan Dilmurod Turdiyev hokim bo‘ldi. Avvalgi hokim — Farruh Hakimovning keyingi faoliyati ma'lum emas.

Uchtepa tumaniga ko‘p yillar davomida Mirzo Ulug‘bek tumani ma'muriyatini boshqargan Shavkatbek Ergashev hokim etib tayinlandi. Avvalgi hokim — Jovdatxon Inog‘omov shu yilning yanvarida ish boshlagandi va uning faoliyati 3 oydan ko‘proq davom etdi.

Nihoyat, Mirobod tumaniga «O‘zbekiston temir yo‘llari» AJ tarkibiga kiruvchi Toshkent mexanika zavodining sobiq boshqaruv raisi — bosh direktor lavozimida ishlagan Shuhrat Po‘latov rahbarlik qiladi. Bu tumanning avvalgi hokimi — Sharofiddin Qodirovning ham keyingi faoliyati noma'lum.