Gretsiyada harbiy vertolyot halokatga uchradi

Gretsiya shimoli-sharqida harbiy vertolyot qulab tushishi natijasida 4 kishi halok bo‘lib, bir kishi jarohatlandi. Mamlakat qurolli kuchlarida 3 kunlik motam e'lon qilingan. Bu haqda Gretsiya Mudofaa vazirligiga asoslangan holda RIA Novosti agentligi xabar tarqatdi.

19 aprel tongida quruqlikdagi qo‘shinlar tarkibidagi UH-1H vertolyoti Larisadan Kozaniga uchish vaqtida Sarantaporu tumani hududiga qulagan. Voqea joyidan 4 kishining jasadi topilgan va ularning barchasi shaxsi aniqlangan. Jarohat olgan ayol harbiy xizmatchi esa shifoxonaga yetkazilgan, ayni vaqtda uning hayotiga jiddiy xavf yo‘q.

Voqea joyiga quruqlikdagi qo‘shinlar bosh shtabi rahbariyati kelgan, hodisa sabablari o‘rganilmoqda.

Gretsiya Mudofaa vaziri Panos Kammenosning ko‘rsatmasiga ko‘ra, qurolli kuchlarda 3 kunlik motam e'lon qilingan.