Dubaygacha borolmagan «Sadoqat»

Insonga atigi bir marta beriladigan umrni orzuga erishish yo‘lida ezgu amallar bilan shunday yashamoq darkorki, hayot intihosida o‘tkazilgan umrguzarolikdan kishida attang qolmasin!
  
Ko‘r-ko‘rona havoyi havasga berilib, sabr va qanoatni unutib, osongina boylik orttirish ilinjida mehr va taskinni o‘zining ota-onasi va yaqinlaridan emas balki, unga yetti yot begona bo‘lsada bir lahzada shirin so‘zlari bilan ko‘ngildan joy ola biladigan shaxslarga ishonib ketayotgan nodonlar uchrab turibdi. Aynan o‘sha kaltafaxmlar bugungi kunda turli nayranglarning, qolaversa, «odam savdosi» deb atalgan jirkanch illatning qurboniga aylanmoqdalar. 

Sadoqat Xudoyorova ham agarda o‘zining or-nomusini, qadr-qimmatini oyoq osti qilmasdan, qiz bola nomiga isnod keltiruvchi odatlardan yiroqlashganida, balkim kimningdir suyukli yori, kimlarningdir mehribon kelini bo‘larmidi. Taassufki, u o‘zining yosh umrini ko‘cha kuyda daydib, otasining mag‘rur boshini egib, qaddini bukdi, g‘am-g‘ussalarning og‘riqli yuklarini ko‘tarolmagan otasi uni uyidan haydab, mahallada sharmisor bo‘lishdan, qizining benomusligidan or qildi.  
  
O‘z uyidan haydalgan qiz o‘zining tanish-bilishlari bilan guldek yoshligini ko‘ngilochar maskanlarda o‘tkazib, aysh-ishratga mukkasidan berildi.    
  
Shu tarzda maqsadsiz daydib yurgan kunlarining birida Vobkent tumanida istiqomat qiluvchi Zulayho Shirinova uning boshini silab, o‘z uyidan joy beradi. Zulayho Shirinova ko‘ngil xushlashni ixtiyor etgan yigitchalarni iltimosini yerda qoldirmay ularga o‘zining tanish qizlarini tortiq qilaverib, o‘zining hojatbarorligi bilan Vobkent tumanida «Zuli» nomi bilan tanilgan. Sadoqat Xudoyorovaning ko‘ngilxushlikka moyilligini ilg‘agan ayol qisqa vaqt ichida u bilan opa-singil tutinib, o‘zining doimiy mijozlari bilan tanishtiradida, «yangi oyimcha»ni benomuslar bozoriga pullay boshlaydi. 
  
Unga qo‘ng‘iroqlashib uyida yashayotgan Sadoqatni bir soatga yoki bir kechaga olib ketadigan shakarguftorlik shinavandalari oldindan Sadoqat uchun atalgan va kelishilgan pulni berib uni visol manziliga olib ketardilar.... 
  
...Dubay. Dunyoning eng azim va go‘zal shaharlaridan biri. Musulmon davlatlarining ko‘zgusi. O‘zining bahavo va shinam joylari, osmono‘par imoratlari bilan jahon ahlini lol qoldirgan jannatmakon shahar. Lekin hozirda bu shahar nomini eshitgan aksariyat kishilar u yerni mutlaqo boshqacha talqin qilishi sir emas. Sababi shundaki,  o‘sha yerda ham nomi qurg‘ur pul va boylik deya har qanday razillikka qo‘l urayotgan, qiz va juvonlarni aldab ularni fahsh yo‘lga boshlayotgan, ozoda shahar nomini turli tuban qilmishlari bilan bulg‘ayotgan «dallol»lar uchrab turibdi.

Shohsanam Jumayeva bir necha yillardan buyon Birlashgan Arab Amirliklarining Dubay shahriga borib kelib anchagina tanish-bilish orttirgan ayollardan. Chunonchi u 2005 yilda Birlashgan Arab Amirligi davlatidan  badarg‘a qilingan bo‘lsada, O‘zbekiston Respublikasi qonunchiligiga asosan chet elga chiqish yoki O‘zbekiston Respublikasiga kirish uchun belgilangan tartibni qo‘pol ravishda buzib, «Dunyoning barcha mamlakatlariga chiqish uchun ruxsat» yozuvini rasmiylashtirmasdan 2014 yilning 11 noyabr kuni O‘zbekiston Respublikasidan Qirg‘iziston Respublikasiga o‘tib, Manas shahridan havo yo‘llari orqali Ummon Sultonligiga noqonuniy ravishda chiqib, Ummon Sultonligi orqali Turkiyaning Istanbul shahriga, undan so‘ng Birlashgan Arab Amirliklarining Dubay shahriga noqonuniy yo‘llar orqali chiqib O‘zbekiston Respublikasi Jinoyat Kodeksining 223-moddasi 2-qismida ko‘rsatilgan jinoyatni sodir etgan. Muqaddam O‘zbekiston Respublikasi Jinoyat Kodeksining 223-moddasi 1-qismi, 227-moddasi 2-qismi va 228-moddasi 3-qismlarida ko‘rsatilgan jinoyatlarni sodir etib 3 marotaba sudlangan bu ayol qilmishlaridan o‘ziga tegishli xulosa chiqarmay, uni yana tekin boylik orttirishning xumori tutadi. 
  
U o‘zining oldindan tanishi bo‘lgan Zulayho Shirinova hamda Birlashgan Arab Amirliklarining Dubay shahrida yashayotgan Xorazm viloyatida tug‘ilgan Muhayyo Rahmonovalar bilan o‘zaro jinoiy til biriktirib, Zulayho Shirinovaning uyida yashayotgan, pul desa o‘zini turli balolarga giriftor qilishga tayyor bo‘lgan Sadoqat Xudoyorovani o‘zi yashayotgan Dubay shahriga chaqirtirib, u yerda turli shaxslar bilan o‘zaro jinsiy yaqinlikda bo‘lish evaziga katta miqdordagi pul ishlab topishi mumkinligiga da'vat qiladi. 

Shohsanam Jumayeva o‘zining jinoiy sherigi Muhayyo Rahmonova bilan birga Zulayho Shirinovaning telefon apparatiga o‘rnatilgan ijtimoiy tarmoqlar orqali qisqa vaqt ichida Sadoqat Xudoyorovani avrab oladilar. O‘z o‘rnida havoyi havaslarga berilgan Sadoqat ham hech ikkilanishsiz ularning bu takliflariga rozilik bildiradi. 

Zulayho Shirinova Sadoqat uchun Dubaydan jo‘natilgan pullar evaziga uning chet elga chiqishi uchun hujjatlarning rasmiylashtirilishiga ko‘maklashib, turli kiyim-kechaklar sotib oladi. Bundan tashqari, Sadoqat Xudoyorovaning nomiga «Toshkent-Dubay» aviachiptasini sotib oladi. 
 
-«Buxoro viloyati Ichki ishlar boshqarmasi xodimlari tomonidan olib borilgan tezkor tadbirlar davomida fuqaro Zulayho Shirinova jabrlanuvchi Sadoqat Xudoyorovani Birlashgan Arab Amirliklarining Dubay shahriga jo‘natish uchun Toshkent xalqaro aeroportiga harakatlanib ketayotgan vaqtida G‘ijduvon tumani «Sarmijon» yo‘l patrul xizmati maskanida qo‘lga olinishi oqibatida ularning jinoiy harakatlariga barham berildi. Xodimlarimizning olib borgan navbatdagi tadbirlari davomida odam savdosi bilan bog‘liq bo‘lgan jinoyatning, qolaversa,  fuqaro Sadoqat Xudoyorovaning odam savdosi qurboniga aylanib qolishining oldi olindi. 

Ayblanuvchilar Jumayeva Shohsanam Halimovna, Shirinova Zulayho Sharipovna hamda Rahmonova Muhayyo Rustamovnalarga nisbatan O‘zbekiston Respublikasi Jinoyat Kodeksining 135-moddasi 2-qismi «g,ye,z,i» bandlari bilan jinoyat ishi qo‘zg‘atilib, tergov harakatlari yakunlandi hamda jazo muqarrarligini ta'minlash maqsadida sud muhokamasiga yuborildi», - deydi Buxoro viloyati IIB Tergov boshqarmasi boshlig‘ining o‘rinbosari podpolkovnik R.Ashurov.
 
Albatta sodir etilgan har qanday huquqbuzarlik uchun javobgarlik, jinoyat uchun esa jazo muqarrar. Jinoyat ishlari bo‘yicha G‘ijduvon tuman sudida qilmishlari tufayli shuvut yuzini berkitib olgan bu uchala odamfurushlar adolat tamoyillari asosida o‘z jazolarini oldilar. 

Shu o‘rinda bir savol tug‘iladi, bugun qilmishlariga iqror holda qonun oldida bosh egib turgan ayollarning kirdikorlarini qanday izohlash mumkin. Va yana shuni alohida ta'kidlab o‘tish joizki, bu kabi qing‘ir yo‘llardan yurishga odatlangan ayollarni, qolaversa, jinoyatga qo‘l urgan shaxslarni jazolash orqali bugun jamiyatimizda sodir bo‘layotgan turli ko‘ngilsizliklarga, noo‘rin jabrlanishlarga, nodonlik ortidan kelayotgan musibatlarga butkul barham berish mumkinmi?   

Baxtiyor Raxmatov, kapitan
Buxoro viloyati IIB