Videoreportaj: O‘zbekiston xalq shoiri Muhammad Yusuf xotirasi tug‘ilgan qishlog‘ida yodga olindi

Bahor quyoshi zaminga o‘z taftini berib, Marhamat adirlari lolaqizg‘aldoqlardan alvon ko‘ylak kiygan payt - 26 aprelda O‘zbekiston Xalq shoiri Muhammad Yusufning tavallud kuni nishonlanadi.

U tug‘ilib, voyaga yetgan Qovunchi qishlog‘ida qutlug‘ sanaga juda katta tayyorgarlik ko‘rilibdi. Shoir ta'lim olgan 25-umumiy ta'lim maktabida esa mushoira, badiiy tadbirlar avjida. Bilim dargohida Muhammad Yusufning hayot yo‘li, ijodi haqida ma'lumotlar beruvchi mo‘'jaz muzey tashkil etilgan. Uning nomi berilgan maktabda faoliyat yurituvchi adabiy to‘garak a'zolari bo‘lgan o‘quvchilar shoir ijodidan namunalar o‘qib berishdi.

Shoir bilan 10 yil bir sinfda o‘qigan sinfdosh do‘stlari esa yoshlik xotiralari, Muhammad Yusuf bilan bo‘lgan qiziq voqealarni gapirib berdilar.

Andijon shahrining bir qator kasb-hunar kolleji talabalari shoirni yo‘qlab, Muhammad Yusuf o‘qigan maktabga kelishganiga guvoh bo‘ldik. Ular maktab o‘quvchilariga o‘zlari tayyorlagan badiiy kompozitsiyalarni namoyish qilishdi. To‘g‘risi, shoirning dilga yaqin ash'orlarini yod olib, ko‘zida yosh bilan o‘qiyotgan kelajagimiz davomchilarini tinglab, Muhammad Yusuf ijodini yanada teranroq angladik, desak mubolag‘a bo‘lmasa kerak.

Shoir dafn etilgan qabriston shu kunlarda uning ziyoratiga kelayotganlar bilan gavjum. Tuman hokimi Xursandbek Sultonov shoir xotirasini qadrlash maqsadida amalga oshirilgan ishlar bilan tanishtirdi. Uni yo‘qlab keluvchilarning soni yildan-yilga ko‘payib borayotgani tufayli, qabristonda bir qator obodonlashtirish va qurilish ishlari qilinibdi. Sharqona uslubda yangi qurilayotgan ayvon, tekis yo‘lakchalar shular jumlasidandir. 

Muhammad og‘a maqbarasi atrofida esa u suygan qizg‘aldoqlar ochilibdi. Hamrohimiz andijonlik yosh, taniqli shoir Ravshan Hamroz ustozining o‘zbek she'riyatidagi o‘rni haqida yonib so‘zladi. Muhammad Yusuf ko‘chasida shovullab oqayotgan ariq oldida san'at kolleji o‘quvchilari shoir qalamiga mansub she'rlarga bastalangan qo‘shiqlardan kuylab berdilar.

Tasvirga olish guruhimiz bilan Muhammad Yusuf qishlog‘idan baholi qudrat videolavha tayyorladik. Videoreportajni tayyorlashga yaqindan yordam bergan Marhamat tuman hokimligiga alohida tashakkurimiz bor.

E'tiboringizga ushbu videotasvirlarni havola qilamiz.

Elmurod Ermatov, Axrorbek Yaqubjonov,  
Kun.uz sayti uchun maxsus Marhamat tumani, 
Qovunchi qishlog‘idan tayyorlandi.