«Barselona» prezidenti firibgarlik bo‘yicha sud oldida javob beradi

«Barselona» futbol klubi prezidenti Xosep Mariya Bartomeu braziliyalik hujumchi Neymarni «Santos»dan transfer qilishdagi firibgarlik va korrupsiya bo‘yicha ish yuzasidan sud oldida javob beradi. Bu holat uning so‘nggi apellyatsiyasi rad etilgach, yuz beradi, deb xabar bermoqda Goal internet nashri.

Fevral oyida Neymar bu ish bo‘yicha sud oldida javob berishi ma'lum bo‘lgandi, endi esa Bartomeuning ham sudga kelishi lozim bo‘ladi.

Bartomeu Neymar 2013 yilda «Barselona»ga o‘tganida, ko‘k-anorranglilarning vitse-prezidenti bo‘lgan, jamoa prezidenti esa Sandro Rosel edi.

Neymarga bo‘lgan huquqning 40 foiziga egalik qiluvchi DIS sarmoya fondi asoschisi Delsir Sonda mart oyi oxirlarida, 25 yoshli futbolchining otasi o‘z vaqtida Roseldan pora olganini ma'lum qildi. Bu braziliyalik forvard 2013 yilda «Santos»dan «Barselona»ga o‘tishi uchun yuz bergan.