16:38 / 01.05.2017
5429

Abdulaziz Komilov «Markaziy Osiyo + Yaponiya» muloqotida ishtirok etdi

Foto: O‘zbekiston TIV matbuot xizmati

2017 yilning 1 may kuni O‘zbekiston Respublikasi Tashqi ishlar vaziri Abdulaziz Komilov boshchiligidagi delegatsiya Ashxobod shahrida «Markaziy Osiyo + Yaponiya» Muloqoti ishtirokchi davlatlari Tashqi ishlar vazirlarining oltinchi kengashi ishida ishtirok etdi. Bu haqda O‘zbekiston TIV matbuot xizmati xabar bergan.

Forumda Qirg‘iziston, Qozog‘iston, Tojikiston, Turkmaniston va Yaponiya tashqi siyosat idoralari rahbarlari ham ishtirok etishgan.

«Savdo va investitsiya sohalarida, jumladan qishloq xo‘jaligi, transport infratuzilmasi va logistika tarmoqlarida qo‘shma loyihalarni amalga oshirishdagi mintaqaviy hamkorlikni jadallashtirish istiqbollari muhokama qilindi. Shuningdek, barqaror rivojlanish, iqlim o‘zgarishi, atrof-muhitni muhofaza qilish va madaniy-gumanitar hamkorlikka oid masalalar ham ko‘rib chiqildi», — deyilgan TIV xabarida.

Olti davlat TIV rahbarlari mintaqaviy xavfsizlikni ta'minlash va xalqaro maydonda hamkorlik qilish masalalari yuzasidan ham fikr almashishgan.

Kengash yakunlariga ko‘ra Qo‘shma bayonot hamda transport va logistika sohalarida hamkorlik qilish to‘g‘risidagi «Yo‘l xaritasi» qabul qilingan.

Top