Amerikaning Apple korporatsiyasi AQShda texnologiyalar sohasida ish o‘rinlarini yaratish maqsadida jamg‘arma tashkil etadi, unga 1 mlrd. AQSh dollari miqdorida mablag‘ kiritiladi. Bu haqda kompaniya rahbari Tim Kuk CNBC telekompaniyasi jurnalistlariga bergan intervyusida ma'lum qilgan.
"Biz AQShda texnologiya sohasida ish o‘rinlarini ko‘paytirish niyatidamiz. Shuni mamnuniyat bilan xabar qilamanki, texnologik ishlab chiqarishni rivojlantirish uchun jamg‘arma tashkil etayapmiz. Avvaliga unga 1 mlrd. dollar mablag‘ kiritiladi", - degan Kuk.
Uning aytishicha, Apple vakillari ko‘rsatilgan fonddan mablag‘ oladigan kompaniyalar bilan maslahatlashuvlar o‘tkazgan. Gap aniq qaysi firmalar haqida ketayotgani noma'lum. Tadbirkorning ishontirishicha, bu sohada yangi ish o‘rinlarini yaratish boshqa sohalarning rivojiga ham turtki beradi. Bularning bari, Kukning so‘zlariga qaraganda, iqtisodiyot uchun uzoq muddatli ijobiy effekt keltiradi.
Apple 1976 yilda tashkil etilgan bo‘lib, iPhone smartfonlari, MacBook noutbuklari, iMac kompyuterlari, shuningdek ko‘plab boshqa texnika ishlab chiqaradi. Korporatsiyaning bozordagi qiymati 750 mlrd. dollarga teng.
