Tramp Komining iste'fosi haqida: «Hali menga rahmat aytishadi»

AQSh prezidenti Donald Tramp MQB (FBI) rahbari Jyeyms Komining iste'foga chiqarilishiga izoh bildirdi.

Uning aytishicha, Komi ko‘pchilikning hurmatini yo‘qotgan va bu orqali MQBning ham mavqeyi tushib ketgan.

«Komi Vashingtonda, respublikachilar va demokratlar orasida ham hurmatini yo‘qotgan edi. Uning o‘rnini yaxshiroq ishlaydigan va foydasi tegadigan odam egallaydi. Umid qilamiz, yangi kelgan odam MQBning mavqeyini tiklashga hissa qo‘shadi. Hammasi tinchib ketganidan keyin hali menga rahmat aytishadi»,- deb yozadi Tramp o‘zining tvitterdagi mikroblogida.

10 may kuni Komi o‘z vazifasidan ozod etilgani e'lon qilingandi. Bu haqda unga telefon orqali xabar qilishgan.

Komi bu lavozimga avvalgi prezident Barak Obama tomondan 2013 yilda 10 yillik muddatga tayinlangandi. Komi bu muddatni to‘liq ishlashni rejalashtirgandi.

Komi Trampga qarshi uning «Rossiya bilan aloqalari» yuzasidan tekshiruv olib borayotgan edi, uning bunday aloqalarini Oq uy ham, Kreml ham rad etadi.