Toshkent va Chimkent hamkorligi yanada kengaydi

Qozog‘iston Respublikasining Janubiy-Qozog‘iston viloyati bilan Toshkent shahri o‘rtasidagi hamkorlikni yanada rivojlantirish, savdo-iqtisodiy, investitsiyaviy, transport-kommunikatsiya, madaniy-gumanitar va boshqa sohalardagi hamkorlikning kuchaytirish maqsadida joriy yilning 18-19 mart kunlari Janubiy-Qozog‘iston viloyati delegatsiyasi Toshkent shahriga tashrif buyurdi. 

Tashrif davomida ikki shahar o‘rtasida savdo-iqtisodiy, investitsiyaviy, transport-kommunikatsiya, madaniy-gumanitar va boshqa sohalardagi o‘zaro hamkorlik qilish masalalari kelishib olingan edi. 

Shu bilan bir qato rda ushbu uchrashuvda Janubiy-Qozog‘iston viloyati va Toshkent shahar hokimining taklifiga binoan Toshkent shahar sanoat korxonalarining ko‘rgazmasini o‘tkazish bo‘yicha kelishib olindi.

Joriy yilning 12-13 may kunlari Qozog‘iston Respublikasining Janubiy-Qozog‘iston viloyati Chimkent shahrida Toshkent shahri sanoat korxonalari tomonidan ishlab chiqarilgan mahsulotlar ko‘rgazmasi o‘tkazildi.

Ko‘rgazmada Toshkent shahridagi 150 dan ziyod korxonalar ishtirok etib, 1000 ziyod turdagi elektrotexnika, metallurgiya va kimyo, yengil sanoat va oziq-ovqat, mebel va qurilish sanoati, xalq iste'mol mollari mahsulotlari namoyish etildi.

Shuningdek ko‘rgazma ishida Janubiy-Qozog‘iston viloyatining 9 ta tumanidan 3500 nafardan ziyod tadbirkorlar hamda boshqarma va tashkilotlardan 1500 dan ziyod ishtirokchilar, viloyatdagi 100 ga yaqin qurilish tashkilotlari vakillari qatnashdilar.

Ko‘rgazmada qozog‘istonlik kompaniyalar va tadbirkorlar Toshkent shahri korxonalari tomonidan ishlab chiqarilgan mahsulotlarga katta qiziqish bildirgan holda 18 mln. dollardan ziyod eksport kontraktlari va shartnomalari hamda kelishuv bayonnomalari imzolandi.

Toshkent shahri delegatsiyasining Janubiy-Qozog‘iston viloyatiga tashrif davrida ikki shahar o‘rtasida o‘zaro savdo-iqtisodiy hamkorlikni rivojlantirish maqsadida “Qozog‘iston Respublikasi Chimkent shahri akimiyati va O‘zbekiston Respublikasi Toshkent shahar hokimligi o‘rtasida hamkorlik Memorandumi” imzolandi.

Ushbu Memorandumda Chimkent shahrida Toshkent shahar savdo uyini ochish orqali savdo va iqtisodiy aloqalarni rivojlantirish, tadbirkorlik sub'yektlariga qulaylik yaratish maqsadida eksport salohiyatini oshirish masalalari belgilab olindi.

Madaniy dastur doirasida o‘zbek san'atkorlari ishtirokida konsert dasturi namoyish etildi hamda Toshkent shahrining oshpazlari o‘zbek milliy taomlari festivalini uyushtirib, chimkentliklarni mehmon qildilar.   

Toshkent shahar hokimligi tomonidan huddi shunday ko‘rgazmalarni Qozog‘iston Respublikasining Olmaota, Qirg‘iziston Respublikasining O‘sh va Turkmaniston Respublikasining Ashxobod shaharlarida ham o‘tkazilishi rejalashtirildi.