«LXR» rahbari tan olinmagan davlatlar ittifoqini tashkil etmoqchi

«Lugansk xalq respublikasi» rahbari Igor Plotnitskiy Tan olinmagan davlatlar ittifoqini tashkil etish haqida taklif kiritdi. Uning fikricha, bu shunday hududiy tuzilmalarning iqtisodiy va siyosiy muammolarini hal qilishda yordam beradi, deb xabar bermoqda «Novorossiya» agentligi.

«Balki, o‘zimizning – Tan olinmagan davlatlar ittifoqini yaratish haqida o‘ylab ko‘rish lozimdir? Sababi biz bittasida yashamoqdamiz – ha, bizga juda qiyin, lekin bizni tan olishmasa, bir-birimizni tan olishimiz, birlashishimiz va o‘zimizning siyosiy, iqtisodiy masalalarimizni hal etishimiz kerak emasmi?», - degan Plotnitskiy.

Uning qo‘shimcha qilishicha, «Bizning xalqlar bizga buning uchun huquq berdi. Nima uchun undan foydalanmasligimiz kerak?». Plotnitskiyning so‘zlariga ko‘ra, «LXR», «DXR», Abxaziya va Janubiy Osetiya kabi tan olinmagan davlatlarda kishilar yashashmoqda, ishlashmoqda va baxtli hayot kechirishga intilishmoqda. «Bizni tan olishni istashmasa, hayot bu bilan yakun topmaydi. Keling, bitta oddiy prinsipni qilamiz – sa'y-harakatlarni birlashtiramiz», - deya xulosa qilgan «LXR» rahbari.