O‘zbekiston va Latviya hamkorligi yanada kengayadi

Latviyada «O‘zbekiston-Latviya savdo-iqtisodiy va sarmoyaviy hamkorligi. Tadbirkorlik faoliyati uchun yangi imkoniyatlar» mavzusida seminar bo‘lib o‘tdi.

Seminar O‘zbekiston Respublikasi Oliy Majlisi Senati raisi Nig‘matilla Yo‘ldoshev boshchiligidagi parlament delegatsiyasining Latviya Respublikasiga 2017 yilning 15-18 may kunlari amalga oshirilgan tashrifi doirasida o‘tkazildi.

Seminar ishida O‘zbekiston va Latviya davlat tuzilmalari hamda ishbilarmon doiralari vakillari ishtirok etdi, deb xabar bermoqda O‘zbekiston Savdo-sanoat palatasi matbuot xizmati.

Nig‘matilla Yo‘ldoshevning ta'kidlashicha, Latviya O‘zbekistonning ishonchli va vaqt bilan sinalgan siyosiy hamda iqtisodiy sherigi sanaladi.

U seminar davomida O‘zbekiston makroiqtisodiy ko‘rsatkichlari, mamlakatdagi islohotlar, shuningdek, xorijiy sarmoyadorlar uchun yaratilgan sharoitlar haqida ma'lumot berdi.

Hozirda O‘zbekistonda Latviyadan bo‘lgan investorlar ishtirokida 47 ta korxona ishlamoqda, 15 ta Latviya kompaniya vakolatxonasi akkreditatsiya qilingan.

Seminar davomida ta'kidlanishicha, O‘zbekiston Latviya kompaniyalarining chorvachilik, parrandachilik majmualarini loyihalashtirish, qurilish va foydalanish borasidagi tajribasini o‘rganishdan, shuningdek, Latviyaning Yevropa Ittifoqining veterinariya, fitosanitar nazorat va oziq-ovqat mahsulotlari xavfsizligi sohasidagi qonunchiligini qo‘llash masalasida ko‘magidan manfaatdor.

O‘zbekiston delegatsiyasi latviyalik tadbirkorlarni O‘zbekistonda oziq-ovqat va yengil sanoat, shuningdek, muqobil energetika sohasida qo‘shma sarmoyaviy loyihalarni amalga oshirishda ishtirok etishga taklif qildi.

O‘zbekiston korxonalari Latviyaga turli mahsulotlarni yetkazib berishga tayyorligi alohida qayd etildi. Shuningdek, seminar qatnashchilari transport va logistika sohasidagi hamkorlik masalalarini ham muhokama qilishdi. Latviya O‘zbekiston tashqi savdo yuklarining Yevropa Ittifoqi davlatlariga yetkazib berilishida juda muhim o‘rin tutadi, bunda aynan uning portlaridan foydalaniladi.

Seminar doirasida tekstil va oziq-ovqat sanoatida ishlovchi qator o‘zbek kompaniyalari mahsuloti ekspozitsiyasi tashkil etildi.

Tadbir yakunida O‘zbekiston Savdo-sanoat palatasi va Latviyaning sarmoyalar hamda taraqqiyot Agentligi o‘rtasida hamkorlik haqida bitim imzolandi.

O‘zbekiston kichik biznes sub'yektlari va xususiy tadbirkorlikni qo‘llab-quvvatlash Fondi hamda Latviya stividorlar Assotsiatsiyasi o‘rtasida o‘zaro anglashuv to‘g‘risida memorandum imzolandi.

«O‘zagroeksport» AJ va A Fruits (Latviya) kompaniyasi Riga shahrida Savdo uyini tashkil etish to‘g‘risida o‘zaro anglashuv memorandumini imzolashdi.

«O‘zbekoziqovqatzaxira» Assotsiatsiyasi va BIOR Ilmiy-tadqiqot laboratoriyasi vakillari o‘rtasida laboratoriya tadqiqotlari sohasida o‘zaro anglashuv va hamkorlik to‘g‘risida memorandum imzolandi.

Tadbir yakunida O‘zbekiston delegatsiyasi va Latviya kompaniyalari vakillari o‘rtasida ikki tomonlama muzokaralar bo‘lib o‘tdi.