Donald Tramp kuyoviga to‘liq ishonadi

AQSh prezidenti Donald Tramp o‘zining katta maslahatchisi va kuyovi Jared Kushnerga to‘liq ishonadi. Ma'lumki, Kushner Rossiya vakillari bilan aloqada ayblanmoqda. Amerika yetakchisining bu bayonoti haqida The New York Times nashri yakshanba kungi (28 may) sonida maqola chop etdi.

«Jared mamlakat uchun ajoyib ishni bajarmoqda. Men unga to‘liq ishonaman. U deyarli barchaning hurmatiga sazovor bo‘lgan. U, shuningdek, mamlakatimizga milliardlab dollarni tejash imkonini beruvchi dasturlar ustida ishlamoqda», — deya Tramp so‘zlarini keltiradi nashr. 

Bundan tashqari, Amerika yetakchisiga ko‘ra, Kushner — «juda yaxshi odam».

26 may kuni The Washington Post gazetasi mamlakat razvedkasi hisobotiga tayangan holda, Kushner va Rossiyaning Vashingtondagi elchisi Sergey Kislyak Trampning o‘tish jamoasi va Kreml o‘rtasida «maxfiy va xavfsiz aloqa kanali»ni tashkil etish imkoniyatini muhokama qilishgan. Gazetaning yozishicha, Kislyak Moskvadagi rahbariyatiga Kushner 2016 yil dekabr oyi boshida Nyu Yorkdagi Tramp-tauer binosida bo‘lib o‘tgan uchrashuvda shunday taklifni bildirgani haqida ma'lum qilgan. 

25 may kuni esa NBC News telekanali FQB Kushnerga nisbatan «Rossiya ishi» bo‘yicha surishtiruv ishlarini boshlab yuborgani haqida xabar qilgan edi. Telekanal manbalari, Kushner «Rossiya hukumatining 2016 yilgi prezidentlik saylovlariga aralashishga urinishlari»ga doir muhim ma'lumotga egaligini aytishgan.