O‘zbekistonda uy-joy kommunal, elektr va gaz ta'minoti xizmatlari ko‘rsatishning yagona billing tizimi tashkil etilmoqda.
O‘zbekiston Prezidenti «Elektr energiyasi va tabiiy gaz yetkazib berish hamda iste'mol qilish sohasida to‘lov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari to‘g‘risida»gi farmonni imzoladi.
Farmonda ko‘rsatilishicha, tizim iste'molchilar bilan o‘zaro hisob-kitoblarning holati haqidagi haqqoniy ma'lumotlarni taqdim etadi va elektron to‘lov tizimlari bilan integratsiya qilinadi.
Mazkur tizim iste'molchilarga qarzdorlik mavjudligi to‘g‘risidagi ma'lumotlarni elektron shaklda olish hamda to‘lovlarni amalga oshirish imkonini beradi.
Shu bilan birga, Qarzdorlikni undirish masalalari bo‘yicha idoralararo elektron hamkorlikning yagona tizimi ham yaratiladi.
Ushbu tizim jismoniy va yuridik shaxslarning mulkiy holati haqidagi ma'lumotlar bazasidan foydalangan holda qarzdorlikni undirish samaradorligini oshiradi.
