«Real» hujumchisi Krishtianu Ronaldu Angliyani sog‘inayotganini tan oldi. U bu davlatda «Manchester Yunayted» tarkibida olti yil o‘ynagan.
«Muxlislar menga hushtakbozlik qilishini yoqtirmayman. Fanatlar 100 foizga harakat qilayotgan o‘z futbolchilariga, u xato qilsa ham hushtak chalishlari kerak emas. Aksincha, jamoada nimadir o‘xshamasa, uni qo‘llab-quvvatlash lozim. „Manchester Yunayted“da o‘ynaganimda, bunday holatlar yo‘q edi. Ehtimol, gap ularning mentalitetidadir. Umuman olganda Ispaniya menga yoqadi, biroq, men Angliyani sog‘inmoqdaman, sababi xotiralarni shunchaki uzib tashlash mumkin emas.
Haqiqatdan ham 40 yoshgacha o‘ynashni istaymanmi? Aslida 41 yoshgacha! So‘nggi bor shartnomani uzaytirganimda, menda yana yangi kelishuv bo‘ladi, dedim. Uning muddati yakunlanganida, men 41 yoshda bo‘laman», - deya 32 yoshli portugaliyalikning so‘zlarini keltiradi Daily Mail.
