General Motors Venesuelada faoliyatini to‘xtatdi

Amerikaning General Motors avtomobilsozlik kompaniyasi Venesueladagi ishlab chiqarishini to‘xtatishga qaror qildi. Ushbu Lotin Amerikasi mamlakati hukumatining korxonani hibsga olib, mol-mulkini musodara qilganidan so‘ng, shunday to‘xtamga kelindi. Bu haqda GM kompaniyasining bayonotida ma'lum qilingan.

Kompaniyaning qayd etishicha, Venesuela Oliy sudi General Motors kompaniyasi tomonidan taqdim etilgan murojaatni e'tiborsiz qoldirganidan Venesuela hukumatining "himoya uchun qonuniy huquq"qa nisbatan "hurmatsizlik qilishi ayon bo‘lgan". Shunga ko‘ra, kompaniya "69 yil mobaynida ish o‘rinlarini tashkil etish, milliy iqtisodiyotning barcha sohalari, shuningdek, venesuelaliklarning mobilligini ta'minlashda muhim hissa qo‘shganidan so‘ng, mamlakatni tark etishga qaror qildi".

Kompaniyaning qayd etishicha, u Venesuela va uning tashqarisida, mazkur Lotin Amerikasi mamlakatida ishlab chiqarishni to‘xtatish sababli yetkazilgan zararni qoplash uchun barcha huquqiy choralarni ko‘radi. 

Avvalroq, korporatsiyaning moliyaviy departamenti vakili Tom Hendersonning TASS agentligiga ma'lum qilishicha, Venesueladagi zavodning to‘xtashidan ko‘riladigan zarar "100 mln dollarni tashkil etiishi mumkin".

Aprel oyida General Motors uning Venesueladagi korxonasi hibsga olingani va mol-mulki musodara qilingani haqida xabar qilgan edi. Mamlakat shimolida joylashgan Valensiya shahrida faoliyat yuritgan korxonada 2,6 mingdan ortiq kishi ishlab, 79ta dilerlik punktlariga mahsulotlar yetkazib berilgan. Aytish joizki, zavod 2015 yildayoq avtomobillar yig‘ishni to‘xtatgan, faqat ehtiyot qismlar ishlab chiqarayotgan edi. Yuqoridagi holat bo‘yicha GM Venesuela Oliy sudiga murojaat qildi, biroq u rad etildi.