Venesuelada norozilik namoyishlari jiddiy tus olmoqda

Aprel oyi boshidan beri Venesuelada davom etayotgan va mamlakatni larzaga solayotgan norozilik namoyishlarida qurbon bo‘lganlar soni 63 kishiga yetdi. Bu haqda  Bolivarlik respublikasi bosh prokurori Luis Ortega Dias Union Radio radiokanalida ma'lum qilgan. Huquqni muhofaza qiluvchi idoraga ko‘ra, bu vaqt mobaynida 1,2 ming kishi jarohat olgan. 

"63ta o‘limdan 19tasi xavfsizlik kuchlari harakatlari bilan bevosita bog‘liq", - degan Ortega Dias. Prokuratura turli xil qoidubuzarliklar bo‘yicha 3,4 ming jinoiy ish qo‘zg‘atgan. Ayni vaqtga kelib, hukumat 420 kishini hibs qilgan, shu bilan birga, 40 nafarga yaqin odam qidirilmoqda, ulardan 19 nafari huquqni muhofaza qiluvchi organlar xodimlaridir. 

Venesuelada so‘nggi bir necha yillar ichidagi eng keng qamrovli norozilik namoyishlariga Oliy sudning prezident Nikolas Maduro vakolatlarini kengaytirish hamda parlament vazifalarini cheklovchi qarorini qabul qilgani sabab bo‘ldi. Bundan tashqari, Oliy sud muxolifat yetakchilaridan biri Enrike Kaprilesuga saylovlarda nomzodini qo‘yishni 15 yilga taqiqladi. Maduro davlat boshqaruvi tizimini isloh qilishi va mamlakat asosiy qonuniga o‘zgartish kiritishi mumkin bo‘lgan Konstitutsiyaviy assambleyani chaqirgani vaziyatni izdan chiqardi.