Polsha ichki ishlar vaziri Yevropadagi migratsiya siyosatini o‘zgartirish kerakligini aytdi

Yevropa Ittifoqi tomonidan amalga oshirilayotgan ochiq chegaralar siyosati ayanchli oqibatlarga olib kelmoqda. Bunday fikrni Polsha ichki ishlar vaziri Mariush Blashak Londonda sodir etilgan oxirgi teraktga izoh berish davomida bildirdi.

"Migratsiya siyosatini o‘zgartirish kerak... Bu borada qat'iy choralar, izchil harakatlar qabul qilinishi lozim. Bunday harakatlarning unsurlaridan biri Shimoliy Afrika, Yaqin Sharq mamlakatlaridan musulmon muhojirlari uchun ochiq eshiklar siyosatini tugatish hisoblanadi", deb aytdi Blashak.

Uning ta'kidlashicha, ko‘p madaniyatlilik va siyosiy xushmuomalalikka yo‘l qo‘yish "yomon oqibatlarga olib keladi". Shu munosabat bilan u Polshaga Yevrokomissiya tomonidan uqtirilayotgan qochqinlarni joylashtirish siyosatida o‘z davlatining ishtirok etishi imkoni yo‘qligini ta'kidlab o‘tdi. 

"G‘arbiy Yevropada terrorchilar amalga oshirayotgan terrorchilik hujumlari bu shunchaki ko‘ngilsiz voqealar emas, balki faktdir", deb hisoblamoqda polshalik vazir.