Nazarboyev ShHT qanday tashkil topganini esladi

Ostona shahrida Shanxay hamkorlik tashkilotiga a'zo davlatlar yetakchilari Kengashi yig‘ilishi bo‘lib o‘tmoqda. 

Tengrinews.kz’ning xabar berishicha, Qozog‘iston prezidenti Nursulton Nazarboyev ShHT qanday tashkil etilganini xotirlab o‘tgan. Joriy yilda tashkilotga 16 yil to‘ladi.

"Bunday paytlarda besh davlat Xitoy Xalq Respublikasi bilan chegaralar muammosini hal etgani bilan bog‘liq holat yodga tushadi. Xitoyning o‘sha paytdagi raisi Tszyan Tszemin bilan ikkimiz edik, men taklif qildim – keling chegaralarni imzolagandan so‘ng tarqalmaymiz, balki iqtisodiy hamkorlikni tashkil etamiz. ShHT shu tarzda paydo bo‘ldi", - dedi Nazarboyev.

"Tashkilot o‘sha vaqtdan beri xalqaro hamjamiyat tomonidan tan olindi, ko‘p sohali hamkorlikning samarali maydonchasiga aylandi. Mintaqada xavfsizlikni mustahkamlash, iqtisodiy hamkorlikni chuqurlashtirish, davlatlarimiz o‘rtasida madaniy-gumanitar aloqalarni kengaytirish bo‘yicha katta ishlar qilindi", - deya yig‘ilish ishtirokchilariga murojaat qildi Qozog‘iston rahbari.

Uning ta'kidlashicha, Ostonadagi ushbu sammit ShHT tarixida yangi sahifani ochmoqda.

"Ushbu yig‘ilish olti tomonlama shaklda so‘nggi bor o‘tmoqda. Biz bugun ShHTga Hindiston va Pokistonni qabul qilish jarayonining yakunlanishi va ularga a'zolik maqomini taqdim etish bo‘yicha qarorni imzolashga kelishib oldik. Yangi a'zolarning qabul qilinishi tashkilotning rivojiga kuchli turtki beradi, uning xalqaro nufuzini oshirishga xizmat qiladi", - dedi Nazarboyev.

"Alohida e'tibor yangi chaqiriqlardan o‘tish, barqarorlik va xavfsizlik tahdidlari masalalariga berilmoqda. Xususan, ushbu sammit doirasida xalqaro terrorizmga birgalikda kurashish bo‘yicha bayonot qabul qilinishi, shuningdek, ekstremizga qarshi kurashish bo‘yicha Konventsiyani imzolash rejalashtirilgan. BU ShHTning ushbu global yovuzlik bilan kurashga qo‘shgan hissasi bo‘ladi", - deya qayd etgan Nursulton Nazarboyev.