Seulning universitetlaridan birida portlash yuz berdi

Janubiy Koreya poytaxti Seulning g‘arbiy qismida joylashgan Yonsey universitetida portlash yuz berdi. Portlash oqibatida universitet professori jarohat oldi, deb xabar bermoqda "Ryonxap" axborot agentligi. 

Politsiyada ma'lum qilinishicha, quti ichiga joylashtirilgan portlovchi modda oliy ta'lim muassasasining muhandislik fakulteti binosida ishlovchi professor xonasida portlagan. 

Professorning aytishicha, u eshik tutqichida osilib turgan sumkada quti topib olgan. "Men qutini ochganimda, u to‘satdan portlab ketdi", deb aytgan professor. Oqibatda erkak kuyish jarohatlari olgan va shifoxonaga yetkazilgan.

Voqea joyiga politsiyaning maxsus bo‘linmalari yuborilgan, universitet qurshab olingan. Politsiya terakt versiyasini istisno qilmayapti.