DW xabariga koʻra, Li Chje Myon 2-oktabrga oʻtar kechasi X ijtimoiy tarmogʻida Ukraina bilan yuzaga kelgan kelishmovchilik haqida bayonot bergan.
«Agar faktlarni tan olish va omma oldida uzr soʻrash yana rad etilsa, biz qoʻshimcha choralar koʻramiz. Bu Koreya xalqi va davlatining shaʼni masalasi, biz uni eʼtiborsiz qoldira olmaymiz», - deb yozgan Janubiy Koreya rahbari.
U Kiyevni Seulni «yolgʻonchi» qilib koʻrsatishda ham ayblagan. Biroq qanday choralar koʻrilishi mumkinligiga aniqlik kiritmagan.
Kiyev: bu diplomatik tushunmovchilik
Ukraina tashqi ishlar vaziri Andrey Sibixa prezident Lining bayonotidan bir necha soat avval Kiyev Janubiy Koreya bilan nizoni tezroq hal qilishdan manfaatdor ekanini bildirgan.
«Buni insident deb atashni istamasdim. Keling, diplomatik tushunmovchilik deylik», - degan u Kiyevda jurnalistlar bilan muloqotda.
Sibixaning aytishicha, soʻnggi kunlarda u Janubiy Koreya tashqi ishlar vaziri bilan har kuni shaxsan muloqot qilmoqda.
«Bu vaziyat yaqin vaqt ichida hal etilishini juda istayman va biz shuning ustida ishlayapmiz. Janubiy Koreya biz uchun muhim mamlakat», - deya taʼkidlagan Ukraina tashqi ishlar vaziri.
U Seul bilan hamkorlik davom etishi va amaliy natijalar berishiga umid bildirgan.
Nizoga ikki asir haqidagi bayonot sabab boʻldi
Sentabr oxirida Ukraina prezidenti Volodimir Zelenskiy BMT Bosh Assambleyasida Kiyev ikki shimoliy koreyalik harbiy asirni Janubiy Koreyaga topshirganini maʼlum qilgan. Shundan soʻng Seul Ukraina tomonini keskin tanqid qilgan.
Li Chje Myonning taʼkidlashicha, bunday maʼlumotning oshkor etilishi asirlarning Shimoliy Koreyada qolgan qarindoshlarini xavf ostiga qoʻyishi mumkin. Shuningdek, bu Seul va Pxenyan munosabatlariga salbiy taʼsir koʻrsatishi ehtimoli bor.
Janubiy Koreya tashqi ishlar vazirining birinchi oʻrinbosari Pak Yun Ju esa Kiyevning maxfiylik kelishuvini inkor etishi oʻzaro ishonchga putur yetkazishini aytib, rasmiy izoh va uzr talab qilgan.
