Alixonov: “Axborot” dasturi yangi ko‘rinishda saqlab qolinadi

14 iyun kuni Xalqaro Press-klubning navbatdagi sessiyasi bo‘lib o‘tdi. U “O’zbekiston 24 : axborot makonidagi yangi istiqbollar” mavzusida tashkil etildi. Tadbirda ishtirok etgan Kun.uz muxbirining ma'lum qilishicha, “O’zbekiston” teleradiokanalining “Axborot” dasturi yangi formatda saqlab qolinadi. 

“Axborot” dasturi taqdiri bizlarni tomoshabinlardan kamroq tashvishlantirayotgani yo‘q. Uning kelgusi taqdiriga biz befarq emasmiz, shu sababli biz bu dasturni saqlab qolamiz”, – dedi sessiyada ishtirok etgan O‘zMTRK raisi birinchi o‘rinbosari Bobir Alixonov. 

Yangiliklar dasturi “O’zbekiston 24” va “O’zbekiston” teleradiokanallarida bir vaqtda efirga uzatiladi. Biroq, dasturning o‘zi “O’zbekiston 24” teleradiokanali tasarrufiga o‘tadi va ushbu teleradiokanal tomonidan tayyorlanadi. 

Alixonovning qo‘shimcha qilishicha, “ushbu dastur 10lab yillar mobaynida aholining keng qatlami kuzatib kelgan asosiy dastur bo‘lgan”. Shu sababli, u yangi tashkil etilayotgan teleradiokanal dasturlarida saqlab qolinadi. 

O‘zMTRK raisi birinchi o‘rinbosarining qayd etishicha, «Axborot» dasturi ko‘rinishi biroz o‘zgargan shaklda saqlab qolinadi. Ammo, uning «mohiyati o‘zgarmaydi».

«Ehtimol bu kunning yakuniy yangiliklar dasturi sifatida o‘zbek va rus tillarida efirga uzatiladigan «Axborot 24» dasturi bo‘lar», – deb qayd etdi Alixonov.

Bundan tashqari, Alixonov “Tahlilnoma” ko‘rsatuvi taqdiriga ham oydinlik kiritib, yaqin orada yangi teleradiokanalda unga o‘xshash ko‘rsatuv paydo bo‘lishini ta'kidladi. 

Ma'lumki, avvalroq, O‘zMTRK teleradiokanallaridagi “Axborot”, “Tahlilnoma”, “Davr”, “Poytaxt” va boshqa yangiliklar dasturlari tugatilishi, ularning o‘rnida bir kunda 24 soat mobaynida efirga uzatiluvchi “O’zbekiston 24” teleradiokanali tashkil etilishi haqida xabar qilingan edi.