Yevroittifoq Afg‘onistonga maxsus vakil tayinladi

Yevropa diplomatiyasi rahbari Federika Mogerini YeIning Afg‘oniston bo‘yicha maxsus vakilini tayinladi. Bu haqda tashqi ishlar bo‘yicha Yevropa xizmati bayonotida aytiladi.

Xabarga ko‘ra, bu lavozimga xizmatning yuqori lavozimli mansabdori Rolan Kobia tayinlangan. Ayni damda u YeIning Myanmadagi vakolatxonasi rahbari lavozimini egallaydi. Maxsus vakil asosiy vazifasiga Yevroittifoqning Afg‘oniston hamda mintaqada uzoq muddatli tinchlik va farovonlikni ta'minlashni qo‘llab-quvvatlash kiradi.

Maxsus vakil 2017 yilning 1 sentabr kuni yangi lavozimda ish boshlaydi va YeIning Afg‘onistondagi vakolatxonasi rahbari Per Mayodon bilan qalin hamkorlik qiladi.