Fyodor Yemelyanenko Mett Mitrionga qarshi jang o‘tkazadi. Mashhur sportchining imkoniyatlari qanday? 

Aralash yakkakurashlar bo‘yicha taniqli rossiyalik jangchi Fyodor Yemelyanenko yakshanba kuniga o‘tar kechasi amerikalik Mett Mitrion bilan Nyu-Yorkdagi Bellator 180 jang kechasida to‘qnash keladi.

Avvaliga bu jangchilar San-Xoseda (AQSh) 18 fevral kuni uchrashishlari lozim edi, biroq jang sanoqli soatlar qolganda bekor qilindi, Mitrionning buyragida kasallik aniqlangan. Natijada Yemelyanenko raqibni almashtirishdan bosh tortdi, hamda jang rasman boshqa muddatga ko‘chirildi. 38 yoshli amerikalik o‘z sog‘ligini yaxshilab oldi va mart oyida jang o‘tkaziladigan yangi sana ma'lum qillindi.

40 yoshli Yemelyanenko uchun bu sportga qaytganidan so‘ng o‘tkazadigan uchinchi jang bo‘ladi. 2015 yilda Yemelyanenko uch yillik tanaffusdan so‘ng faoliyatini tiklagani haqida ma'lum qildi. O‘sha yilning 31 dekabr kuni rossiyalik bir necha daqiqa ichida hindistonlik Jaydip Singxni taslim etdi.

2016 yilning iyunida esa Yemelyanenko braziliyalik Fabio Maldonado bilan to‘qnashdi. Unda Fyodor hakamlar qaroriga ko‘ra g‘alaba qozondi.

Yemelyanenko bilan shug‘ullangan Aleksandr Michkovning fikricha, Fyodor Mitrion bilan bahsda muammolarga duch kelmasligi kerak. “U ham tezroq, ham ancha kuchli zarbaga ega. Agarda uning sog‘ligi bilan hammasi joyida bo‘lsa, jangda katta muammolar bo‘lmaydi”, - degan u.

Xabarlarga ko‘ra, Yemelyanenko tayyorgarlikni an'anaviy ravishda yopiq rejimda o‘tkazdi. 

Rossiyalik jangchi Habib Nurmagomedovning xabar qilishicha, 24 iyun kungi jangni juda kutmoqda. "Fyodorning raqibi noodatiy hech narsaga ega emas. Biroq, u chap qo‘lda juda kuchli zarbaga ega, agarda adashmasam, u chapaqay. Fyodorga birinchi raundda yaxshi kikdaun tilamoqchiman", - dedi Nurmagomedov.

Fyodor Yemelyanenko aralash yakkakurashlarda 40 ta jang o‘tkazib, 36 g‘alabaga erishgan. Mitrion esa UFC va Bellator’da qatnashib, 11 g‘alabani qo‘lga kiritgan.