Yoshlar ittifoqiga Qahramon Quronboyev rahbar bo‘ladi

Qahramon Quronboyev «Kamolot» yoshlar ijtimoiy harakati o‘rnida tashkil etilgan O‘zbekiston Yoshlar ittifoqiga rais bo‘ladi. «Kun.uz» manbalari ma'lumot berishicha, qurultoyda tashkilot rahbarligiga aynan uning nomzodi ko‘rsatilgan.

Qahramon Quronboyev shu yil yanvarida O‘zbekiston Respublikasi prezidentining tashkiliy-kadrlar masalasi bo‘yicha davlat maslahatchisining birinchi o‘rinbosari etib tayinlangandi.

Qahramon Quronboyev 1992 yilda Mirzo Ulug‘bek nomidagi O‘zbekiston Milliy universitetini tamomlagan. 2004 yilda O‘zbekiston Respublikasi Prezidenti huzurida Davlat va jamiyat qurilishi akademiyasini tugatgan. U turli yillarda O‘zbekiston Respublikasi Vazirlar Mahkamasi, O‘zbekiston Milliy universiteti, O‘zbekiston Respublikasi Prezidenti huzuridagi Davlat va jamiyat qurilishi akademiyasi, «Kamolot» YoIH, O‘zbekiston milliy teleradiokompaniyasida faoliyat yuritgan.

Bugundan «Kamolot» YoIH faoliyati tugatilib, uning o‘rnini O‘zbekiston Yoshlar ittifoqi egalladi.

Harakatga shu yil aprelidan buyon Odiljon Tojiyev rahbarlik qilib kelayotgandi, endi u Qahramon Quronboyevga o‘rinbosar bo‘lishi mumkin.