Shavkat Mirziyoyev Germaniya prezidentiga hamdardlik bildirdi

O‘zbekiston Respublikasi Prezidenti Shavkat Mirziyoyev Germaniya Federativ Respublikasi prezidenti Frank-Valter Shtaynmayyerga ta'ziya izhor qildi. Ta'ziyanoma matni prezidentning rasmiy sayti president.uz’da e'lon qilindi.

«Bavariya federal yerida yo‘lovchi avtobusi ishtirokida yo‘l-transport hodisasi ro‘y bergani natijasida ko‘plab insonlar halok bo‘lgani va jabrlangani haqidagi xabarni chuqur qayg‘u bilan qabul qildim», deyiladi ta'ziyanoma matnida.

«Sizga chuqur ta'ziya izhor etaman, halok bo‘lganlarning oila a'zolari va yaqinlariga hamdardligimni yetkazishingizni so‘rayman, jabrlanganlarning barchasi tezroq sog‘ayib ketishini tilayman», — degan o‘z maktubida Mirziyoyev.

Oldinroq xabar berganimizdek, Bavariyada sayyohlik avtobusi falokatga uchrashi oqibatida 18 kishi halok bo‘lgan.

Voqea 3 iyul kuni ertalab Germaniyaning janubidagi A9 shossesida yuz bergan. Saksoniyadan sayyohlarni olib kelayotgan avtobus yuk mashinasi bilan to‘qnashib, yonib ketgan. Avtobusda 46 yo‘lovchi va 2 haydovchi bo‘lgan. 30 ga yaqin jabrlanganlar haqidagi ma'lumot darhol berilgan, qolganlarning taqdiri esa yana bir necha soat noma'lum bo‘lib qolgan, ular bedarak yo‘qolgan, deb hisoblangan. Qutqaruvchilar omon qolganlarni qidirishga vertolyot jalb qilganlar. Avtobanning avariya yuz bergan qismi uzoq vaqtga to‘sib qo‘yilgan.