Dunyoning eng qimmat himoyachisi oxir-oqibat «Liverpul»da bo‘ladi

«Sauthempton» himoyachisi Virjil van Deyk transfer oynasi yakuniga (31 avgust) qadar baribir «Liverpul»ga o‘tadi. Bu haqda Sky Sports futbolchilarga yaqin manbaga tayanib xabar berdi.

Oldinroq, «Sauthempton» niderlandiyalik futbolchini mavsumoldi tayyorgarlik uchun Fransiyaga boradigan futbolchilar orasiga kiritmagandi. Bunga uning jamoada to‘p surishni istamayotgani va o‘zini qo‘yib yuborishlarini so‘ragani sabab bo‘lgan.

Iyun oyi boshida «Sauthempton» «Liverpul»ning van Deyk bilan ularning ruxsatisiz muzokaralar olib borgani uchun APL rahbariyatiga shikoyat xati bilan chiqqandi. Shundan so‘ng mersisaydliklar «avliyolar»dan uzr so‘ragan va ortiq bu himoyachiga qiziqmasliklarini bildirgandi.

Endilikda bu transfer mavzusiga yana qaytiladigan ko‘rinadi. Van Deykning transferi 70 million yevroga baholanmoqda. Agar transfer amalga oshsa, niderlandiyalik himoyachi dunyoning eng qimmat himoyachisiga aylanadi.