FVV tizimi organlarining ish tartibi belgilandi

Vazirlar Mahkamasining 9.08.2017 yildagi 606-son qarori bilan FVV, O‘zgidromet va "Davsuvxo‘jaliknazorat" davlat inspeksiyasi to‘g‘risidagi nizomlar tasdiqlandi. Bu haqda Norma.uz xabar bermoqda.
 
Favqulodda vaziyatlar vazirligi (FVV)
 
Vazirlik tabiiy va texnogen xususiyatli favqulodda vaziyatlarning oldini olish va oqibatlarini bartaraf etish, fuqaro muhofazasi, gidrometeorologiya, gidrotexnik inshootlarning barqaror faoliyatini ta'minlash, seysmik kuzatuvlar, kichik hajmli kemalarni bexatar ishlatilishini, suv obektlarida fuqarolarning hayoti va sog‘lig‘ini muhofaza qilish ishlarini amalga oshiruvchi davlat boshqaruvi organi hisoblanadi.
 
Vazirlikning markaziy apparati, uning hududiy boshqarmalari, Gidrometeorologiya xizmati markazi, «Davsuvxo‘jaliknazorat» davlat inspeksiyasi, Seysmoprognostik monitoring respublika markazi, shuningdek idoraviy bo‘ysunuvdagi boshqa tashkilotlar FVVning yagona tizimini tashkil etadi.
 
Favqulodda vaziyatlar vaziri Bosh vazir taqdimiga binoan Prezident tomonidan lavozimga tayinlanadi va lavozimdan ozod qilinadi. Birinchi o‘rinbosar va o‘rinbosarlar Prezident tomonidan lavozimiga tayinlanadi va undan ozod etiladi (ilgari – Vazirlar Mahkamasi tomonidan). 
 
Pochta manzili: 100084, Toshkent shahri, Yunusobod tumani, Kichik halqa yo‘li, 4-uy.
 
FVV huzuridagi Gidrometeorologiya xizmati markazi (O‘zgidromet)
 
Gidrometeorologiya sohasidagi masalalarni hal qiluvchi maxsus vakolatli davlat boshqaruv organi hisoblanadi.   
 
Markaziy apparat, hududiy gidrometeorologiya boshqarmalari, «Gidrometpribor» ilmiy-ishlab chiqarish korxonasi, «Meteoinfosistem» axborot-texnik boshqarmasi, Gidrometeorologiya ilmiy-tekshirish instituti, Toshkent gidrometeorologiya kasb-hunar kolleji, shuningdek idoraviy bo‘ysunuvdagi boshqa tashkilotlar “O‘zgidromet”ning yagona tizimini tashkil qiladi.
 
O‘zgidromet bosh direktori Prezident tomonidan lavozimga tayinlanadi va lavozimdan ozod etiladi, birinchi o‘rinbosari esa — Prezident bilan kelishgan holda Vazirlar Mahkamasi tomonidan lavozimga tayinlanadi va lavozimdan ozod etiladi. Bunda bosh direktor maqomi va mehnatga haq to‘lash shartlari bo‘yicha vazirning birinchi o‘rinbosariga, bosh direktorning birinchi o‘rinbosari esa — vazir o‘rinbosariga tenglashtiriladi.
 
O‘zgidrometning pochta manzili: 100052, Toshkent shahri, Yunusobod tumani, Bodomzor yo‘li 1-tor ko‘cha, 72-uy.
 
FVV huzuridagi Katta va alohida muhim suv xo‘jaligi obektlarining texnik holatini hamda bexatar ishlashini nazorat qilish davlat inspeksiyasi (Davsuvxo‘jaliknazorat)
 
Ushbu davlat boshqaruvi organi gidrotexnika inshootlari xavfsizligini davlat tomonidan nazorat qilish sohasida maxsus vakolatli organ hisoblanadi. Uning tuzilmasiga hududiy inspektorlar kiradi.
 
Inspektsiya quyidagilar yuzasidan davlat nazoratini amalga oshiradi:

•  katta va alohida muhim suv xo‘jaligi obektlari texnik holatining ishonchliligi hamda ularning bexatar ishlashini ta'minlash;
•  katta va alohida muhim suv xo‘jaligi obektlari loyihalashtirilishi, qurilishi, foydalanishga qabul qilinishi, ishlatilishi, rekonstruksiya qilinishi, ta'mirlanishi, konservatsiyalanishi va tugatilishi, shu jumladan loyihalar ekspertizasi tashkil etilishi, qurish, rekonstruksiya qilish, foydalanishga qabul qilish, konservatsiyalash va tugatish sifati yuzasidan nazoratni amalga oshirish;
•  katta va alohida muhim suv xo‘jaligi obektlarining ishonchli qo‘riqlanishini tashkil etish.
 
Davsuvxo‘jaliknazoratga Prezident tomonidan lavozimga tayinlanadigan va lavozimdan ozod etiladigan boshliq boshchilik qiladi. O‘z o‘rinbosarini boshliq favqulodda vaziyatlar vaziri bilan kelishgan holda tayinlaydi.
 
Davsuvxo‘jaliknazorat xodimlari maqomi va mehnatga haq to‘lash shartlari bo‘yicha:

•  boshliq — vazirning birinchi o‘rinbosariga;
•  boshliq o‘rinbosari — vazir o‘rinbosariga;
•  boshqarma apparati katta mutaxassislari — vazirlikning bosh boshqarmasi boshlig‘iga;
•  mutaxassislar — vazirlikning bo‘lim boshlig‘iga;
•  hududiy inspektorlar — viloyatlar hokimliklarining tegishli mustaqil bo‘limlari rahbarlariga;
•  hududiy bo‘linmalarning yetakchi mutaxassislari — viloyatlar hokimliklarining mustaqil boshqarmalari va bo‘limlari yetakchi mutaxassisiga tenglashtiriladi.
 
Davsuvxo‘jaliknazorat pochta manzili: 100200, Toshkent shahri, Shayxontohur tumani, Turkqo‘rg‘on ko‘chasi, 26-uy.