O‘quv dargohini tamomlamagan Azizjon Alimjonov (ism-familiyalar o‘zgartirilgan) tengdoshlari qatori tadbirkor bo‘lish o‘rniga, mudhish “biznes” qilishni o‘ylab qoladi. O‘ziga kollejdagi do‘stlari Qosim Anvarov, Muhammad Nuriddinov, Anton Andreyev va Ismoil Davlatxo‘jayevni sherik qildi. Bu shaxs yigitlar bilan “reja” tuzdi. Unga asosiy jinoiy guruh a'zolari yurtimizdagi reklama bilan shug‘ullanuvchi internet-saytlar orqali Ikrom Murodjonovni topishadi, deb yozmoqda “Huquq” gazetasi.
Ikrom “ishbilarmon” yigitlarning shum niyatlaridan xabari yo‘q edi. U internet-saytida o‘ziga tegishli “TOSHIBA” va “DELL” rusumli noutbuklarni sotish uchun e'lon bergandi. 2016 yilning 28 dekabr kuni Azizjon Alimjonov noutbuk sotib olmoqchi bo‘lgandek Ikromga qo‘ng‘iroq qildi.
- Uzr, e'lon bo‘yicha qo‘ng‘iroq qilib turibman. Noutbukingizni ko‘rsam bo‘ladimi? Bugun ko‘rishsak, nima deysiz?
- Yaxshi. Soat 20:00larga Bobur parkida. Bo‘ladimi?
- Ma'qul...
Uchrashuv uchrashuvi vaqti va joyini begilab olishadi. “Ishbilarmon”lar esa g‘arazli “reja”larini tuzishdi. Ikrom kelishilgan vaqtda Bobur parkining yoniga kelib turdi. Azizjon esa sheriklari bilan uchrashuv vaqtidan oldinroq kelib, park atrofida aylanib yurishadi.
Ikromni ko‘rib, Azizjon ham uning oldiga keldi. Ular o‘zaro suhbatlashishdi. Shu asnoda Azizjon noutbuklarni ko‘rib, Ikromga yuzlandi.
- Aka, qarshi bo‘lmasangiz, noutbukni ota-onamga ham ko‘rsatishim kerak edi. Men bilan Rakat mahallaga borsangiz, ota-onamdan pulni olib beraman. Maylimi?!
Ikrom u aytgan mahalla uchrashuv joyidan uncha uzoq bo‘lmaganligi sababli rozi bo‘ldi. Ammo bu tuzoq ekanligidan bexabar edi. Ular taksiga o‘tirib, ko‘p qavatli uylarning xilvatroq hovlisiga kelishdi. Guruhning qolgan yigitlari esa allaqachon bu yerga yetib kelishgandi. Azizjon bilan Ikrom taksidan tushishdi. Taksi ketgan zahoti yigitlar Ikromning qo‘lidagi noutbuklarini tortib olib, uning duch kelgan joyiga tayoq bilan ura boshlashdi. Vahshiylarcha kaltaklangan Ikrom voqea joyida hushidan ketdi.
Yigitlar jinoyat ortidan topilgan “TOSHIBA” va “DELL” rusumli noutbuklarni shu kunning o‘zidayoq 800 AQSh dollariga fuqaro Bahrom Qodirovga sotib yuborishdi.
Ikromning behush yotganini ko‘rgan fuqarolardan biri darhol ichki ishlar idorasiga va “Tez tibbiy yordam”ga qo‘ng‘iroq qiladi. Shifokorlarning o‘z vaqtida ko‘rsatgan tibbiy yordami tufayli Ikrom Murodjonovning hayoti saqlab qolindi.
Jamiyatda yurish-turish qoidalarini mensimagan, bunday qilmishlar uchun javobgarlik muqarrar ekanligini unutgan A.Alimjonov, Q.Anvarov, M.Nuriddinov, A.Andreyev va I.Davlatxo‘jayevga jinoyat ishlari bo‘yicha Yakkasaroy tuman sudining hukmi bilan tegishli jazo tayinlandi.
