Turkmaniston, BAA va Portugaliya prezidentlari Mirziyoyevni tabrikladi

O‘zbekiston mustaqilligining 26 yilligi munosabati bilan O‘zbekiston Respublikasi Prezidenti Shavkat Mirziyoyev nomiga xorijiy davlatlar va hukumatlar, nufuzli xalqaro tashkilotlar rahbarlaridan samimiy qutlovlar kelishi davom etmoqda, deb xabar berdi O‘zA.

Ularda davlat rahbariga baxt-saodat, omonlik va muvaffaqiyatlar, O‘zbekiston xalqiga tinchlik-osoyishtalik, ravnaq hamda farovonlik tilab, chin dildan ezgu istaklar izhor etilgan. 

“O‘zbekiston Respublikasi Prezidenti 
Shavkat Mirziyoyev Janobi Oliylariga 

Muhtaram Shavkat Miromonovich! 

Sizni va Sizning timsolingizda qardosh o‘zbek xalqini O‘zbekiston Respublikasi Mustaqillik kuni munosabati bilan Turkmaniston xalqi, hukumati va shaxsan o‘z nomimdan samimiy tabriklayman va ezgu tilaklarimni yo‘llayman. 

Turkmaniston bilan O‘zbekiston o‘rtasidagi barcha yo‘nalishlar, jumladan, siyosiy, savdo-iqtisodiy, ijtimoiy, madaniy-gumanitar va boshqa sohalardagi munosabatlar yuqori darajada ekanini va bu aloqalar izchil rivojlanib, yanada mustahkamlanib borayotganini mamnuniyat bilan ta'kidlayman. Mamlakatlarimizning davlatlararo muloqotni yanada kengaytirishga bo‘lgan qat'iy yondashuvi xalqlarimiz manfaatiga mosdir. 

Muhtaram Shavkat Miromonovich, ushbu qulay fursatdan foydalanib, Sizga mustahkam sog‘liq, baxt-saodat, muvaffaqiyatlar, qardosh O‘zbekiston Respublikasi xalqiga tinchlik va yanada farovonlik tilayman. 

Samimiy hurmat bilan, 
Gurbanguli Berdimuhamedov,
Turkmaniston Prezidenti” 

* * *

Shuningdek, quyidagilar o‘z tabriklarini yo‘llagan: 

Birlashgan Arab Amirliklari Prezidenti Xalifa bin Zoid Ol Nahayon 

Birlashgan Arab Amirliklari Vitse-prezidenti, Bosh vaziri, Dubay Amirligi hokimi Muhammad bin Roshid Ol Maktum 

Birlashgan Arab Amirliklari Qurolli kuchlari Bosh qo‘mondoni o‘rinbosari, Abu Dabi Amirligi valiahdi Muhammad bin Zoid Ol Nahayon 

Portugaliya Respublikasi Prezidenti Marselo Rebelo de Souza 

Gretsiya Respublikasi Prezidenti Prokopis Pavlopulos 

Chexiya Respublikasi Prezidenti Milosh Zeman 

Qutlovlar kelishi davom etmoqda.