Atlantikada 7 yil ichida birinchi marta uchta dovul paydo bo‘ldi

Atlantika okeanida 2010 yildan beri birinchi marta birdaniga uchta dovul paydo bo‘ldi, deb xabar qilmoqda The Daily Mail.

Kecha Meksika ko‘rfazidagi Meksika qirg‘oqlarida paydo bo‘lgan «Katya» tropik po‘rtanasi dovulga aylandi. Shu bilan birga, Atlantika okeanida yuzaga kelgan «Xose» tropik po‘rtanasi ham dovullar qatoriga kiritildi. 

«Irma» dovuli esa 6 sentabr kuni Karib dengizidagi orolga yopirildi.

Atlantikada 1893 va 1998 yillarda birdaniga to‘rtta dovul harakatda bo‘lgan.

Saffir-Simpsonning besh ballik shkalasi bo‘yicha beshinchi toifa berilgan «Irma» dovulining zarbasini Antigua va Barbuda orol davlati o‘ziga qabul qilib oldi. Bu davlat bosh vaziri Gaston Braunning so‘zlariga ko‘ra, mamlakatdagi qariyb barcha binolar tabiiy ofat tufayli ziyon ko‘rgan. Antigua va Barbuda aholisining taxminan 60 foizi o‘z uylarini tark etishga majbur bo‘lgan.

Shuningdek, bu tabiiy ofatdan Karib dengizidagi Sen-Marten hamda Sen-Bartelemi fransuz orollari ham jiddiy zarar ko‘rdi. So‘nggi ma'lumotlarga ko‘ra, u yerda sakkiz kishi halok bo‘ldi, yana 20 dan ortiq inson jabrlandi. Sen-Marten hukumati orol «95 foizga vayron bo‘lgani» haqida ma'lum qildi.

7 sentabr kuni esa dovul Puerto-Rikoga yetdi. Associated Press’ning xabar berishicha, 900 ming kishi elektr ta'minotisiz qolgan.

Iqlimshunoslarning ma'lumotiga ko‘ra, «Irma» dam olish kunlarigacha Florida qirg‘oqlariga yetadi, Amerikaning bu shtatida evakuatsiyaga tayyorgarlik ko‘rilmoqda, iqlimshunoslar esa bu dovul kuch bo‘yicha Texasga avgustda yopirilgan «Harvi»dan ham qudratliroq ekani haqida ogohlantirishmoqda.

Kutilishicha, juma kuniga kelib «Xose» kuchayadi, hamda unga kuchlilik darajasi bo‘yicha uchinchi toifa beriladi. AQSh dovullarni kuzatish bo‘yicha Milliy markazining ta'kidlashicha, hozircha «Xose» kishilarga tahdid uyg‘otayotgani yo‘q, sababi u ochiq okeanda, qirg‘oqlar hamda orollardan uzoqroq masofada harakatlanmoqda. Biroq, u tezlik bilan kuchaymoqda, va uning harakati o‘zgarishi mumkin.