Eron va Rossiya KXDRga yadroviy qurolni yaratishda yordam ko‘rsatganlikda gumon qilinmoqda

Buyuk Britaniya hukumati Pxenyanning yadroviy qurolga egalik qilish istagining tezda amalga oshishida Eron yo Rossiya yordam bergan bo‘lishi mumkinligidan xavfsiramoqda. The Sunday Telegraph shu haqida xabar berdi. 

Nashrning Buyuk Britaniya hukumatidagi manbalari shimoliy koreyalik olimlar mamlakatning yadroviy texnologiyaga ega bo‘lishini mustaqil ravishda  ta'minlagani borasidagi ma'lumotni ishonchli deb hisoblashmaydi. Shu munosabat bilan Britaniya TIV amaldagi yoki sobiq yadroviy derjavalarning qay biri KXDRga bunday texnologiyalarni taqdim etgani yoki mamlakatga konsultatsion xizmat ko‘rsatgani borasida tergov ishi o‘tkazmoqda. 

"Eron u yoki bu shakldagi yordam ko‘rsatganlikda gumon qilinayotgan mamlakatlar ro‘yxatida boshchilik qilmoqda, shuningdek Rossiya ham diqqat markazida", - deya ta'kidlanadi maqolada. 

Maqolada Britaniya hukumatining umidi Pxenyanga yadroviy texnologiyalarning ehtimoliy yetkazib beruvchisini aniqlash "iqtisodiy sanksiyalarga qaramay, yo‘nalishini o‘zgartirishdan bosh tortayotgan rejimga bosim o‘tkazish uchun yangi diplomatik imkoniyatlarni ochishi"ga qurilayotgani qayd etilgan.

Ta'kidlash joizki, 3 sentabr kuni KXDR vodorod zaryadini muvaffaqiyatli sinovdan o‘tkazgani haqida ma'lum qildi. Xalqaro hamjamiyat bunga keskin munosabat bildirdi. Xususan, AQSh prezidenti Donald Tramp Pxenyan bilan hamkorlik qiluvchi mamlakatlar bilan savdo aloqalariga butkul nuqta qo‘yish masalasini ko‘rib chiqayotganini ma'lum qildi.