Melanya Tramp Zagrebdagi reklamalardagi suratini 24 soat ichida olib tashlashni talab qildi

AQSh prezidenti rafiqasi Melanya Tramp Xorvatiyadagi Amerika instituti Zagreb shahri ko‘chalarida o‘rnatgan reklama bilbordlaridagi suratini 24 soat ichida olib tashlashni talab qildi.

Melanyaning manfaatlarini bildiruvchi advokat Natasha Pirts Musar plakatlarni o‘rnatgan korxona Xorvatiya qonunchiligidan bexabarligi haqida fikr bildirgan. Jumladan, unga ko‘ra biror odamning suratini uning roziligisiz tijorat maqsadlarida qo‘llash taqiqlanadi.

Ma'lum qilinishicha, avvalroq Xorvatiya poytaxti ko‘chalarida AQSh birinchi xonimining AQSh bayrog‘i fonidagi surati tushirilgan reklama bilbordlari paydo bo‘lgandi. Unda "Ingliz tilini oz miqdorda bilgan holda qanchalik uzoqqa borishingizni tasavvur qilib ko‘ring-a!" degan yozuv bo‘lgan. Bu bilan asli sloveniyalik bo‘lgan Melanyaning AQSh birinchi xonimi darajasigacha yetganiga sha'ma qilingan. 

Reklama kampaniyasi muallifi Zagrebdagi Amerika instituti bo‘lgan. Ta'kidlanishicha, ushbu kreativ marketing Melanyaning noroziligiga sabab bo‘lgan va uning vakillari bu holat yuzasidan sudga shikoyat tayyorlashmoqda.