Misr hukumati qachon yangi poytaxtga ko‘chib o‘tadi?

Misrning yangi ma'muriy poytaxti kelgusi yilning oxiriga borib hukumat muassasalarini qabul qilishga tayyor bo‘ladi. Qohiradan sharqqa tomon 45 kilometr masofada Yangi Qohira loyihasining qurilishi ketmoqda. Bu haqida yakshanba kuni "Al-Ahram" gazetasi xabar berdi. 

"2018 yil oxiriga borib vazirliklar, hukumat muassasalari va prezident kantselyariyasi u yerga ko‘chishi mumkin bo‘ladi", - dedi bosh vazir Sharif Ismoil. Bosh vazir shu tariqa tirbandlik va 20 millionli aholi zichligidan "jabrlanayotgan" shaharni imkon qadar bo‘shatishga umid qilmoqda. Uning so‘zlariga ko‘ra, yaqin orada keng ko‘lamli loyiha doirasida sarmoyachilar uchun bir necha turar-joy va ma'muriy qurilish uchastkalarini ajratish rejalashtirilmoqda. 

Ta'kidlash joizki, Misrning yangi ma'muriy poytaxtiga doir reja haqida 2015 yilning martida e'lon qilingan.

Suvaysh kanaligacha cho‘zilgan va dunyoning eng mashhur biznes-markazlari bilan bellasha oladigan Yangi Qohira loyihasi 45 milliard dollarga baholanadi. U 700 kvadrat kilometrli maydonda joylashadi. Hozirgi poytaxt ma'muriy poytaxt bilan temir yo‘l tarmog‘i orqali bog‘lanadi, shuningdek havo porti va Yaqin Sharqdagi eng yirik ko‘ngilochar park ham ishga tushiriladi. Bundan tashqari, u yerda 40 ming nomerli osmono‘par mehmonxonalar va 25 daha barpo etiladi. 

Bunday katta loyihaning amalga oshishi poytaxtdan 5 million kishini ko‘chirish imkonini beradi, hukumat muassasalari, parlament va prezident qarorgohi, shuningdek diplomatik hududlarga ko‘chib keluvchi amaldorlar ham shular jumlasidandir. U yerda hozirning o‘zidanoq ko‘chmas mulkni xarid qilish mumkin, 2018 yilning o‘rtalaridan boshlab Yangi Qohiraga ko‘chishni boshlash kutilmoqda.