4 oktabr kuni O‘zbekiston Respublikasi Oliy Majlisi Senatining 12-yalpi majlisi bo‘lib o‘tdi. Uning kun tartibiga 8 ta masala kiritilib, senatorlar dastlab “O‘zbekiston Respublikasi bilan Qirg‘iziston Respublikasi o‘rtasidagi davlat chegaralari to‘g‘risidagi shartnomani (Bishkek, 2017 yil 5 sentabr) ratifikatsiya qilishdi.
Shundan so‘ng, Senat a'zolari “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunni muhokama qilishdi va yakdillik bilan tasdiqlashdi.
Mazkur qonunda O‘zbekiston Respublikasi Bosh prokuraturasi huzurida Majburiy ijro byurosi, O‘zbekiston Respublikasi veterinariya qo‘mitasi tashkil etilganligi tufayli yangi qonun bilan qator qonunchilik hujjatlari, xususan, 9 kodeks, o‘nga yaqin qonunga o‘zgartish va qo‘shimchalar kiritilishi belgilangan.
Bundan tashqari, 2017-2021 yillarga mo‘ljallangan Harakatlar strategiyasida fuqarolarning xususiy mulk huquqi kafolatlarini mustahkamlashni kuchaytirish belgilangan. Unda xususiy mulkni himoya qilish va xususiy mulk obektlaridan samarali foydalanishni amalga oshirish mexanizmini takomillashtirish, jinoyat quroli yoki ma'muriy huquqbuzarlik predmeti sifatida mulkdan foydalanishda mulkdorning aybi bo‘lmagan hollarda mulkni olib qo‘yish (vaqtinchalik olib qo‘yishdan tashqari) va musodara qilishni taqiqlash to‘g‘risidagi qonun hujjatlariga o‘zgartish va qo‘shimchalar kiritish belgilangan.
Ushbu vazifada belgilangan yangi talablar Jinoyat-protsessual kodeksining 211-moddasi va Ma'muriy javobgarlik to‘g‘risidagi kodeksning 27-moddasiga kiritilishi Qonun bilan belgilanmoqda.
