Texnik moylar va texnik suyuqliklarga talablar to‘g‘risidagi umumiy texnik reglament tasdiqlandi

O‘zbekiston Respublikasi Vazirlar Mahkamasi 2 oktabr kuni “Moylash materiallari, texnik moylar va texnik suyuqliklarga talablar to‘g‘risidagi umumiy texnik reglamentni tasdiqlash haqida”gi qarorni chiqardi.

Hujjat bilan moylash materiallari, texnik moylar va texnik suyuqliklarga talablar to‘g‘risidagi umumiy texnik reglament ilovaga muvofiq tasdiqlandi va rasmiy e'lon qilingan kundan boshlab olti oy o‘tgandan keyin amalga kiritiladi.

“Texnik jihatdan tartibga solish to‘g‘risida”gi qonun talablariga muvofiq texnik reglamentlar amalga kiritilgach, ularda ko‘rsatilgan mahsulotlar va xizmatlarga doir ilgari qabul qilingan standartlashtirish bo‘yicha normativ hujjatlar majburiylik xususiyati yo‘qotishi va belgilangan tartibda qo‘llanilishda ixtiyoriylik kasb etishi ma'lumot uchun qabul qilindi.

“O‘zstandart” agentligi vakolatli organlar bilan birgalikda ushbu qaror bilan tasdiqlangan Umumiy texnik reglament belgilangan tartibda amalga kiritilgan kundan boshlab moylash materiallari, texnik moylar va texnik suyuqliklarga qo‘yiladigan majburiy talablarni belgilovchi standartlashtirish bo‘yicha normativ hujjatlarni qo‘llashda majburiylik xususiyatini bekor qilish va ixtiyoriylikni ta'minlash choralarini ko‘radi.