Suriyada rossiyaliklar samolyoti halokatga uchradi

Suriyadagi Xmeymim aerodromida rossiyaliklarning Su-24 rusumli samolyoti halokatga uchradi, ekipaj halok bo‘lgan. Bu ma'lumot Rossiya Mudofaa vazirligining axborot va ommaviy kommunikatsiyalar departamenti tomonidan tasdiqlangan.

«10 oktabr kuni Xmeymim aerodromidan jangovar topshiriqni amalga oshirish uchun uchish chog‘ida Su-24 samolyoti halokatga uchradi», - deya ma'lum qilgan departament vakili.

U samolyot ekipajini katapulta qilishga ulgurilmagani va ular halok bo‘lishganini ma'lum qilgan. Mudofaa vazirligi samolyot qulashi oqibatida yerdagilar jabrlanmaganini qo‘shimcha qilgan.

Bundan avval rossiyaliklar samolyoti ishtirokidagi halokatli hodisa 2015 yilning noyabrida ro‘y bergan, o‘shanda Suriya va Turkiya chegarasi yaqinida turkiyalik uchuvchi tomonidan Rossiyaning Su-24 rusumli harbiy samolyoti urib tushirilgan, hodisa oqibatida rossiyalik uchuvchi Oleg Peshkov halok bo‘lgandi.