Musobaqalashishning qanday foydasi bor?

O‘zingiz uchun sport bilan shug‘ullanmasangiz ham, professional sportchi karerasi haqida orzu qilmasangiz ham, havaskor musobaqalarda qatnashib turing. Bu sizga boshqa yo‘l bilan topib bo‘lmaydigan qoniqish hissini beradi, deyiladi "Layfxaker"da.

To‘g‘ri, ba'zi odamlar bolaligidan musobaqalarda ishtirok etadi. Ularga buning nima uchun kerakligini tushuntirishga hojat yo‘q, bu ular uchun - sportdagi hayotining oddiy bir qismi. Quyidagi tavsiyalar esa "o‘zi uchun" sport bilan shug‘ullanuvchilar va musobaqalarda qatnashishni istamaydiganlar uchun.

1. Qo‘shimcha motivatsiyaga ega bo‘lasiz

Ba'zan mashg‘ulotlar zerikarli bo‘lib boradi, vaqti-vaqti bilan esa ular kayfiyatingizni tushirishi ham mumkin: masalan, biror narsaning uddasidan chiqa olmaganingizda. Musobaqalarga tayyorlanayotganingizda dangasalik yoki yomon kayfiyat chekinadi, zero siz oldindagi musobaqada munosib ishtirok etish uchun motivatsiya olasiz.

Oddiy mashg‘ulotlarda siz, anglab yo anglamay, bo‘sh tomonlaringizni qayta ishlashni chetlab o‘tishingiz mumkin, chunki uddasidan chiqa olmayotgan narsaga qayta to‘qnash kelish yoqimsiz.

Turnirga tayyorgarlik vaqtida esa hech qanday ikkilanishlarsiz o‘zingizning bo‘sh tomonlaringiz ustida ishlashga kirishasiz va tezkor natijalarga ega bo‘lasiz.

Men buni o‘zimda his qildim. So‘nggi ikki oyda men 20-25 kilogrammli shtangalar bilan shug‘ullandim. Musobaqalardan ikki kun oldin yana 10 kilogramm qo‘shdim va 35 kilogrammli shtangani ko‘tardim.

Musobaqalarda uyatga qolmaslik uchun mashg‘ulot sayin yanada shiddat bilan harakat qilardim. Qat'iy dedlaynsiz bu og‘irlikka qanday yetib kelish mumkinligini tasavvur ham qila olmayman.

2. Unutilmas hissiyotlarga ega bo‘lasiz

Musobaqa vaqtida siz maksimal darajada diqqatni jamlashga muvaffaq bo‘lasiz, imkoniyatlaringiz esa oshib boradi. Bularning bari adrenalin hisobiga ro‘y beradi.

PIT (The People, Ideas and Things) jurnalida chop etilgan ilmiy maqola bu gormonning qanday ishlashiga izoh beradi.

Adrenalin yurak ritmi va qon bosimini oshiradi, yurakning qon ishlab chiqarish xususiyatini yaxshilaydi. Qon tomirlari skelet mushaklari va bosh miyaga ko‘proq ozuqaviy moddalar yetkazib beradi, buning hisobiga esa diqqatni jamlash jarayoni yaxshilanadi.

Shuningdek adrenalin yurakka qon yetib borish jarayonini sekinlashtirib, ba'zi qon tomirlarning qisqarishiga olib keladi. Bu kerakli sohalarda ozuqaviy moddalar bilan to‘yingan qonni ushlab turadi va faollikni uzaytiradi.

Qoningizdagi adrenalin miqdori yuqori bo‘lganida o‘zingizni kuchli, tezkor va hushyor his qilasiz. Bu juda farahbaxsh tuyg‘u.

3. O‘z imkoniyatlaringiz chegarasini bilib olasiz

Organizmimiz energiyani saqlab qolishga sozlangan, shuning uchun oddiy mashg‘ulotlarda doim ko‘proq harakat qilishga to‘g‘ri keladi. Shunda ham tana qo‘shimcha motivatsiya va maxsus shart-sharoitlarsiz to‘liq shug‘ullanishga imkon bermaydi.

Mashg‘ulotlarda tanaffussiz ko‘pi bilan 10 marta tortila olardim va bundan ortig‘i qo‘limdan kelmaydi deb o‘ylardim. Murabbiy musobaqalar uchun tanaffussiz 20 marta tortilish kerak dedi. Ikki karra ko‘p! Mashg‘ulotlarda bor kuchim bilan harakat qildim va bor-yo‘g‘i 13 marta tortildim. Musobaqada esa 23 marta tortilishga muvaffaq bo‘ldim!

Musobaqalarda energiyani saqlash bloki yechiladi. Siz har bir mashqni mushaklaringiz rad etguncha bajarasiz, jismoniy imkoniyatlaringizning borini ishga solasiz. Shu tariqa imkoniyat chegaralaringizni bilib olasiz va nimalarga qodir ekaningizni anglab yetasiz.

4. Qulaylik zonasidan chiqasiz

Musobaqalarda birinchi marta qatnashish juda hayajonli, ayniqsa maydonga chiqqunga qadar. Biroq ishtirokdan keyin qo‘rquv o‘rnini qoniqish hissi egallaydi. Bunda sizning g‘olib yo mag‘lub bo‘lganingiz muhim emas - bu boshqa yo‘l bilan to‘plab bo‘lmaydigan tajriba.

5. Muloqot doirangizni kengaytirasiz

Musobaqalarga turli mamlakat va shaharlardan odamlar tashrif buyuradi. Bu siz bilan qiziqishlari bir bo‘lgan kishilar bilan tanishishning ajoyib usulidir.

Siz vaqtingizni yoqimli o‘tkazishingiz, ko‘plab ijobiy tasavvurlarga ega bo‘lishingiz va yanada kuchli atletlar bilan tanishishingiz mumkin.

Musobaqalarga tayyorlaning, ishtirok eting va doim undan-da katta marralarni ko‘zlang, shunda sport sizga ilhom baxsh etishdan to‘xtamaydi.