Ronaldu: «Messi-Ronaldu davri tugamadi, u endi boshlanmoqda»

Madridning «Real» klubi hujumchisi Krishtianu Ronalduning ishonch bildirishicha, u hamda «Barselona» forvardi Lionel Messi futbol ishqibozlarini hali ko‘p xursand qilishadi. Portugaliya terma jamoasi futbolchisi bu haqda FIFA tomonidan 2017 yilning eng yaxshi futbolchisi, deb tan olinganidan so‘ng aytib o‘tdi.

«Men har kuni kechqurun xotirjam uyquga yotaman. Shaxsiy va jamoaviy darajada erishayotgan yutuqlarimdan ko‘nglim to‘lmoqda. Men Messi bilan emas, balki eng yaxshi bo‘lish hamda sovrinlarni yutib olish uchun kurashmoqdaman. Biroq, shuni ham aytishim mumkinki, Messi-Ronaldu davri tugamadi, u endi boshlanmoqda», - deya Ronalduning so‘zlarini keltiradi Marca.

Joriy yilda Ronaldu «Real» bilan Ispaniya chempionati va Superkubok, YeChL hamda UYeFA Superkubogida g‘alaba qozondi. Portugaliyalik YeChLdagi 13ta o‘yinda 12ta gol urib, eng yaxshi to‘purarga aylandi.

Ronaldu FIFA’ning The Best sovrinini ketma-ket ikkinchi marta yutib oldi. Bundan tashqari, 32 yoshli forvard «Oltin to‘p» hamda «FIFA Oltin to‘p»ini ikki martadan qo‘lga kiritgan. 2008 yilda esa «FIFA yil o‘yinchisi» sovriniga egalik qilgan.