“Adolat” SDP tashabbusi bilan Toshkentda ommaviy hashar tashkil etildi

2017 yilning 28 oktabr kuni O‘zbekiston “Adolat” sotsial-demokratik partiyasining “Tozalik yo‘lida birlashaylik” loyihasi doirasida Chilonzor tumani “Baynalmilal” ko‘chasining “Kamolon” ko‘prigidan “Oqtepa” ko‘prigigacha bo‘lgan qismini ko‘ngillilar tomonidan hashar yo‘li bilan tozalash ishlari tashkil etildi.

Hasharda avtomobil yo‘li va kanalning yon atrofidagi mahallalar fuqarolari, shu qatorda joylashgan idora va muassasalar vakillari, partiyaning Oliy Majlis Qonunchilik palatasi va xalq deputatlari Toshkent shahar Kengashidagi deputatlari, partiya faollari, tibbiyot (DSENM) muassasalari, “Mahalla” xayriya jamoat fondi hamda mahalliy hokimliklar vakillari ishtirok etdi.

Ma'lumki, azaldan ota-bobolarimiz obodonlashtirish ishlariga alohida e'tibor qaratib kelgan. Albatta, bu ezgu ishlarni amalga oshirishda xalqimizga xos bo‘lgan hasharning o‘rni katta. Shu bois partiya tashabbusi bilan o‘tkazilgan hasharda hamshaharlar erta tongdan o‘z uyi, mahallasi, o‘zi istiqomat qilayotgan turar joy atrofini obodonlashtirish, ozoda va pokizaligini saqlashda faol ishtirok etdilar.

Shu o‘rinda ta'kidlash joiz, O‘zbekiston “Adolat” SDP saylovoldi dasturida ko‘zda tutilgan maqsad-vazifalardan kelib chiqib, mutasaddi tashkilotlar bilan hamkorlikda atrof-muhit ifloslanishining oldini olish, aholi salomatligini himoya qilish maqsadida tashkil etilgan  “Tozalik yo‘lida birlashaylik” loyihasi fuqarolarda shahar-qishloqlarimizni toza saqlashga bo‘lgan daxldorlik xissini oshirish, xususan, ularni ko‘ngilli ravishda, hashar yo‘li bilan atrof-muhitning tozaligini ta'minlashga safarbar etish, yurt obodligi yo‘lida yoshlarni birlashtirish, ularning tarbiyasida tozalik orqali tibbiy madaniyatni shakllantirishga xizmat qiladi.

Loyiha doirasida tashkil etilgan dastlabki ko‘ngillilar hasharida mahalla fuqarolari, shu hududda joylashgan tashkilot va muassasalar vakillari, partiya faollari hamda obodonlashtiriishga mas'ul bo‘lgan tashkilotlar xodimlari faol ishtirok etdilar. Hashar davomida azim Toshkent shahrining qon tomiri sanalgan anhor arig‘ining “Kamolon” ko‘prigidan “Oqtepa” ko‘prigigacha bo‘lgan ikki kilometrdan ortiq masofadagi qismi yig‘ilib qolgan turli chiqindilar, shox-shabba va xazonlardan tozalandi. Partiya tashabbusi bilan o‘tkazilayotgan bunday ko‘ngillilar hasharlari respublikning barcha hududlari bo‘ylab davom ettirilishi nazarda tutilgan.