Rossiyaning "Birinchi kanal"iga davlat tomonidan 3 milliard rubl ajratildi

27 oktabr kuni Rossiya davlat dumasi "2017 yil va 2018-2019 yillarga rejalashtirish davri uchun federal byudjyet to‘g‘risida"gi Federal Qonunga o‘zgartirishlar kiritishga doir qonun loyihasini uchinchi o‘qishda qabul qildi. RBKda aniqlik kiritilishicha, tuzatishlar, xususan, "Birinchi kanal" ("Pervyy kanal") AJga 3 milliard rubl qo‘shimcha subsidiyani ko‘zda tutadi. Hujjatda ko‘rsatilishicha, bu mablag‘lar "dasturiy mahsulotni ishlab chiqarish va xarid qilish, u bilan teleefirni to‘ldirish va teletomoshabinlarga yetkazish chora-tadbirlarini ta'minlash bilan bog‘liq xarajatlarni qoplash"ga yo‘naltiriladi. 

Qonun loyihasini sharhlovchi xatda subsidiya shuningdek "Birinchi kanal" AJning joriy va xalqaro faoliyatini amalga oshirish bilan bog‘liq olinmagan daromadlar"ni qoplashni ham ko‘zda tutadi.  

Byudjyetga tuzatishlar kiritilgandan so‘ng Bosma va ommaviy kommunikatsiyalar bo‘yicha Federal agentlik ("Rospechat") "Birinchi kanal"ga subsidiyalar taqdim etish qoidalarini ishlab chiqish haqida ma'lum qildi. Juma kuni Normativ-huquqiy hujjatlar federal portalida shunga doir xabarlar paydo bo‘ldi. Qoidalar loyihasida aniqlik kiritilishicha, davlat tomonidan qo‘llab-quvvatlanish "Birinchi kanal"ga "Televizion texnik markazi" FDUK bilan eshittirishlarni tashkil qilishga doir xizmatlarni taqdim etganlik uchun, "Rossiya televizion va radioeshittirishlar tarmog‘i" FDUK bilan 100 ming kishidan ortiq aholiga ega bo‘lgan shaharlarda signal tarqatganlik uchun, "Kosmik aloqa" FDUK bilan taqdim etilgan aloqa kanallari uchun hisoblashishga yordam beradi. Bundan tashqari, subsidiyalar "Birinchi kanal"ga kino- va telekontent namoyishi uchun huquq beruvchi litsenziya va shartnomalarni to‘lash imkonini beradi. 

Idora vakili RBKning shunga doir savoliga javob bermagan.

Ta'kidlash joizki, davlat "Birinchi kanal" AJning 51 foizini nazorat qiladi, "Rosimushchestvo" — 38,9 foiz, "ITAR-TASS" FDUK — 9,1 foiz, «Televizionnyy texnicheskiy sentr» FDUK — 3 foiziga egalik qiladi.