Tramp Texasdagi fojiani yovuzlik akti deb atadi

Texasning Sazerlend-Springs shaharchasida 26 kishining o‘limi bilan yakunlangan fojiali hodisani AQSh prezidenti muqaddas dargohdagi yovuzlik akti deb atadi.

«Yovuzona hujum. Bu vaqtda qurbonlar o‘z oila a'zolari bilan ibodat qilishayotgandi. Biz his qilayotgan g‘am-anduhni ifodalashga so‘z ojiz. Bu fojia oqibatida yaqinlarini yo‘qotgan kishilarning dardi esa bundan ham og‘ir. Yuraklarimiz parchalandi», — degan Donald Tramp Yaponiyadagi chiqishi vaqtida.

U Amerika xalqi bu qora kunlarni yengib o‘tishini qo‘shimcha qilgan.

«Biz birlashamiz. Bir-birimizning qo‘llarimizdan tutamiz. Bu yig‘ilar va g‘amlardan keyin ham biz kuchli bo‘lib qolishimiz kerak», — deya qayd etgan davlat rahbari.

Donald Tramp cherkovdagi otishmada halok bo‘lganlar xotirasiga mamlakat bayroqlarini tushirib qo‘yish haqida farmoyish berdi.

Oq uy va barcha jamoat binolari, harbiy postlar va dengiz bazalaridagi bayroqlar 9 noyabr kuni quyosh botguniga qadar tushirib qo‘yiladi.

5 noyabr kuni Amerikaning Texas shtati Sazerlend-Springs shahrida qurollangan erkak baptistlar cherkovi dindorlarini o‘qqa tutdi. Ushbu ommaviy qotillik oqibatida 26 kishi halok bo‘lib, yana 20 ga yaqin kishi yaralandi. Qotillik sodir etgan shaxs mashinasidan jonsiz holda topildi.

Cherkovdagi odamlarni o‘qqa tutgan shaxs AQSh fuqarosi, 26 yoshli Devin Patrik Kelli bo‘lib, u 2010 yildan 2014 yilga qadar AQSh harbiy-havo kuchlarida xizmat qilgan.