AQSh koinotda urush olib borish uchun tayyorlanmoqda

AQSh koinotga yangi harbiy harakatlar olib borish uchun yangi maydon sifatida qaramoqda. Bu haqda AQSh harbiy-havo kuchlari vaziri Xezer Uilson Pentagondagi brifingda aytib o‘tdi.

“Biz koinotni harbiy harakatlar olib boriladigan hudud sifatida ko‘rishga o‘tmoqdamiz”, deb aytdi Uilson.

Uilsonning aytishicha, 2018 yilda Pentagon koinot ishlanmalarining “iqtisodiy foydali modernizatsiyasi” uchun xarajatlarni 20 foizga oshirishni rejalashtirmoqda.

“Biz faoliyatimizning barcha yo‘nalishlari bo‘yicha o‘z qudratimizni oshirish uchun koinot sohasidagi modernizatsiyani ilgari suramiz”, deb qo‘shimcha qilgan vazir.

Uning eslatishicha, o‘tgan haftada Vashington 100 mln dollar ajratilishi ko‘zda tutilayotgan Space Enterprise Consortium dasturi boshlanishini e'lon qilgan.

“Bu dastur yordamida imkoniyatlarimizni jadal kengaytirish maqsadida koinotda ko‘proq tajriba o‘tkazish va modellashtirish bilan shug‘ullanamiz”, deb ta'kidlab o‘tgan Uilson.

AQSh HHK shtabi boshlig‘i general Devid Goldfinning aytishicha, xalq amerikalik harbiylardan “hujumdan erkinlik va harakatlar erkinligini” ko‘zda tutuvchi  koinotdagi ustunlikni kutmoqda.