«Oliy liga talabiga javob beradigan klublar 12tadan ham kam bo‘lishi mumkin»

OFK sobiq xodimi Alisher Nikimbayev O‘zbekiston Futbol Federatsiyasi tomonidan futbolni rivojlantirish bo‘yicha amalga oshirilayotgan chora-tadbirlar borasida o‘z fikrini bildirib o‘tdi.

Jumladan, Alisher Nikimbayev Oliy ligada qatnashayotgan klublarning soni emas, sifati muhim ekanini ta'kidlar ekan, O‘zbekiston Futbol Federatsiyasining Oliy liga formatini o‘zgartirish va klublarni litsenziyalash bo‘yicha talablar kuchaytirgani mana shu sifatni ta'minlashga xizmat qilishini ta'kidlab o‘tdi.

«Men OFKda ikki yil davomida litsenziyalash masalalari bilan shug‘ullanganman. Lisenziyalash jarayoni futbolni rivojlantirish uchun eng asosiy instrument. Federatsiya mana shu instrumentdan foydalanayotgani meni xursand qilmoqda. Avvallari litsenziyalash masalasiga jiddiy ahamiyat qaratilmagan. Masalan, «Obod», «Sho‘rtan» kabi klublar litsenziyalash talablariga javob bermaydi. Lekin ularga Oliy ligada ishtirok etishga ruxsat berilgandi. Lisenziyalashda asosiy tamoyillardan biri klublarning o‘z futbol maktabi, mashg‘ulot maydonlari bo‘lishi hisoblanadi. Lekin biz yaxshi bilamizki, «Obod» klubining o‘z futbol maktabi yo‘q.

Agar klublarni litsenziyalash bo‘yicha saralaydigan bo‘lsak, balki Oliy liga talabiga javob beradigan klublar 12tadan ham kam qolar. Nima bo‘lgan taqdirda ham, Oliy ligada talabga javob beradigan futbol klublari ishtirok etishi kerak», deydi Alisher Nikimbayev .

Bundan tashqari, futbol mutaxassisi Oliy liga klublaridagi murabbiylar masalasiga ham e'tibor qaratish kerakligi ta'kidlab o‘tdi. Hozirda milliy chempionatimizdagi klublarning yarmidan ko‘prog‘ida yosh murabbiylar faoliyat yuritayotgani, ushbu murabbiylarning malakasini oshirish uchun Malayziya, BAA, Rossiya kabi davlatlarda o‘quv seminarlari tashkil qilish zarurligini ham qo‘shimcha qildi.