APL. «Liverpul» va «Chelsi» o‘yinida g‘olib aniqlanmadi

Angliya Premer-ligasida 13-tur o‘yinlari davom etmoqda.

Turning markaziy o‘yinida «Liverpul» va «Chelsi» bellashdi. Muxlislar murosasiz kurashlarga boy bo‘lgan qiziqarli o‘yinning guvohi bo‘lishdi.

Dastlabki bo‘lim mezbonlarning tashabbusi ostida o‘tdi. Ammo ular hisobni ikkinchi bo‘limda ochishdi. 65-daqiqada himoyachilar xatosidan foydalangan Muhammad Saloh jarima maydoniga yorib kirib, yaqin masofadan darvozani ishg‘ol etdi.

Shundan so‘ng, «Chelsi» katta kuch bilan oldinga o‘tdi va hisobni tenglashtirishga erishdi. 85-daqiqada Villianning aqlbovar qilmas zarbasidan so‘ng, to‘p darvozabon ustidan oshib o‘tib, to‘rdan joy oldi.

O‘yin oxiriga qadar har ikkala jamoa g‘alabani tortib olishi mumkin edi. Biroq, darvozalarga boshqa to‘p kiritilmadi.

Bu natijadan so‘ng, «Chelsi» 26 ochko bilan musobaqa jadvalida uchinchi, «Liverpul» esa 23 ochko bilan beshinchi o‘rinni egallab turibdi.

APL, 13-tur
Liverpul – Chelsi 1:1 (0:0, 1:1)
25 noyabr, «Enfild» stadioni
Gollar: 1:0 – 65 Saloh, 1:1 – 85 Villian. 
Liverpul – Minole, Matip, Moreno, Gomes, Klavan, Milner, Xenderson, Koutino (Lallana, 89), Oksleyd-Chemberlen (Mane, 89), Saloh, Starrij (Veynaldum, 66).
Chelsi – Kurtua, Kristensen, Keyxill, Alonso, Aspilikueta, Azar, Drinkuoter (Fabregas, 74), Kante, Bakayoko (Pedro, 77), Dzappakosta (Villian, 83), Morata.