Saakashvili Ukrainada davlat to‘ntarishiga urinishda ayblanmoqda

Gruziyaning sobiq prezidenti, Odessa oblastining sobiq gubernatori, «Dvijyeniya novyx sil» partiyasi yetakchisi Mixail Saakashviliga davlat to‘ntarishini amalga oshirish bo‘yicha ayb qo‘yildi.

«Saakashvili konstitutsion tuzumni ag‘darishga urinishda ayblanmoqda»,— deya siyosatchining advokati Pavel Bogomazovning so‘zlarini keltirgan TASS agentligi.

Ukraina Xavfsizlik Xizmati (UXX) xabariga ko‘ra, janob Saakashvili Ukraina Jinoyat Kodeksining 256-moddasi 1-qismi (jinoiy tashkilot faoliyatida ishtirok etish va uning faoliyati haqidagi ma'lumotlarni yashirish) bo‘yicha qo‘lga olingan.

Bugun ertalab UXX xodimlari Saakashvilining kvartirasini tintuv qilish uchun kelganida u uyi joylashgan 8 qavatli binoning tomiga chiqib olgan va o‘zini pastga tashlash bilan tahdid qilgandi.

Ayni vaqtda huquq-tartibot organlari xodimlari janob Saakashvilini tergov qilishmoqda, unga gumonlanuvchi sifatida qaralayotgani ma'lum qilingan.

Mixail Saakashvilining uyi oldida siyosatchining tarafdorlari va maxsus xizmatlar xodimlari o‘rtasida to‘qnashuvlar boshlangan. TASS ma'lumotiga ko‘ra, uning uyi joylashgan ko‘chada siyosatchining tarafdorlari bo‘lgan 200dan ortiq kishi yig‘ilgan.

3 dekabr Kiyevda Mixail Saakashvili va «Rux novyx sil» partiyasi tashabbusi bilan marsh bo‘lib o‘tgandi. Faollar Ukraina prezidenti Petro Poroshenkoning iste'fosini talab qilishgandi.

Saakashvili Poroshenkoni davlat dushmani deb atadi va Ukraina fuqarolarini mamlakatdagi oligarxlar diktaturasini ag‘darib, uning o‘rniga «o‘rta sinf diktaturasini» o‘rnatishga chaqirdi.

Kunning ikkinchi qismida harbiy formadagi noma'lum shaxslar ushbu mitingni translyatsiya qilayotgan NewsOne telekanali binosi atrofini to‘sib olishdi. «Kommersant'» muxbiri Ukraina prezidenti ma'muriyatidagi manbasiga asoslanib xabar berishicha, bu shaxslar Kiyevda ommaviy namoyishlar boshlashni istayotgan Saakashvili qutqusi bilan harakatlangan.

17 oktabrdan buyon Kiyevdagi Rada binosi oldida namoyishlar bo‘lib o‘tmoqda. Namoyishchilar deputatlik daxlsizligining bekor qilinishi, aksilkorruptsion sud yaratish haqidagi qonunning qabul qilinishi va saylov islohotlari o‘tkazilishini talab qilishmoqda.