Nazarboyev: Qirg‘iziston haqida bir marta ham yomon gapirmadim

Qozog‘iston Sooronbay Jeenbekov boshchiligidagi Qirg‘iziston delegatsiyasi ko‘taradigan masalalarni hal qilishga butunlay tayyor. Bu haqda prezident Nursulton Nazarboyev ma'lum qildi, deb xabar bermoqda Tengrinews.kz.

Ostona shahrida Qozog‘iston va Qirg‘iziston yetakchisining rasmiy uchrashuvi boshlandi.

"Biz sizlarni kutgandik va katta xursandchilik bilan qabul qildik. Qozog‘iston Sizning boshchiligingizdagi Qirg‘iziston delegatsiyasi ko‘taradigan barcha masalalarni hal qilishga butunlay tayyor. Biz 26 yildan beri mustaqil davlat sifatida qadam tashlab kelmoqdamiz. Men bu vaqt davomida Qirg‘iziston haqida bir marta bo‘lsa ham yomon so‘z aytmadim, yomon qadamlarni qo‘ymadim. Bu noto‘g‘ri. Biz kelamiz va ketamiz, ikki qo‘shni davlat esa bizdan avval ham bo‘lgan hamda bizdan keyin ham bo‘ladi", - deya murojaat qildi Nazarboyev Jeenbekovga Oqo‘rdadagi uchrashuvda.

Uning ta'kidlashicha, har bir avlodda o‘ziga xos mas'uliyat bor – ikki mamlakat o‘rtasidagi do‘stlikni, yaxshi o‘zaro munosabatlarni saqlab qolish va avloddan avlodga yetkazish.

"Qozog‘istonga rasmiy tashrif bilan kelish uchun taklif qilganingizdan chuqur minnatdorman. Bizni samolyotning o‘zidayoq iliq kutib olishdi – buni his qildik. Men mamlakat prezidenti etib saylanganimda, siz juda iliq tabrik yo‘lladingiz, va, fursatdan foydalanib, o‘z minnatdorchiligimni bildirmoqchiman. Siz bizning oqsoqolimiz, katta birodarimizsiz. Qozoqlar va qirg‘izlar – birodar xalqlar. Bizda yer bir, bir xil manbalardan suv ichamiz, bir yo‘llardan yuramiz. Men strategik aloqalar, bizning ittifoqchilik munosabatlarimiz mustahkamlanishi uchun barcha sa'y-harakatni amalga oshiraman", - dedi Sooronbay Jeenbekov.