Hisoblagichdan o‘chirilgan energiyalar

Prezident tomonidan joriy yilning 29 may kuni “Elektr energiyasi va tabiiy gaz yetkazib berish hamda iste'mol qilish sohasida to‘lov intizomini yanada mustahkamlash, shuningdek ijro ishi yuritish tizimini tubdan takomillashtirish chora-tadbirlari to‘g‘risida”gi farmon bejiz qabul qilinmadi. Boisi, keyingi paytlarda tabiiy gazdan foydalanish va uning to‘lovini o‘z vaqtida amalga oshirish haqida so‘z yuritilganda, “kechagina to‘lab kelgan edik, yana falon million so‘m qarzimiz qayerdan kelib qoldi ekan,” yoki “gaz idorasi nazoratchisiga to‘lagan edik, qo‘limizda kvitansiya turibdi, biroq bu pullarimiz kompyuterga tushmabdi,” degan gaplar tez-tez quloqqa chalinadigan bo‘ldi, deb yozadi “Huquq” gazetasi.

Mavjud qarzdorlikni gaz hisoblagichdan o‘chirib berish evaziga tamagirlik qilayotgan “nazoratchilar”ning qilmishlari oqibati emasmikin bular.

Shohruh Rajabov (ism-familiyalar o‘zgartirilgan) “G‘arbgazta'minot” unitar korxonasi “Buxorotumangaz” “Chorbakr” hududiy ekspluatatsiya brigadasida gaz maromlash punktlarini ko‘rikdan o‘tkazuvchi chilangar lavozimida ishlab kelib, filial abonent xizmati avtomatlashtirilgan boshqaruv tizimi texnigi Sherali Hayotov bilan jinoiy til biriktiradi.

-  Shohruh aytgan odam men bo‘laman, - dedi anchadan buyon “hojatbaror” gaz idorasi xodimi Sh.Hayotovni kutib turgan ayol. – Shohruh iltimos qilib yubordi, yordam bersangiz yaxshi bo‘lardi. Hisoblagich 3 million 200 ming so‘m yozgan. Qancha bersam, “nol” qilib berasiz?

-  O‘zingiz bilasiz, hozir bu ishni qilish juda qiyin. Shunday bo‘lsa-da, ishonchli odam bo‘lganingiz uchun 2 million 500 ming so‘m berasiz...

-  Mana, hozircha bori 900 ming so‘m. Qolganini yangi yildan keyin berarman...

Va'daga muvofiq, o‘tgan yilning 5 yanvar kuni kechki payt Buxoro tibbiyot instituti oldida iste'molchi G.Nuraliyeva va Sh.Rajabov uchrashishdi. Ayol qolgan 1 million 600 ming so‘mni berib, Shohruhdan tabiiy gaz to‘lovidan qarzi yo‘qligi haqidagi ma'lumotnomani oldi. Aslida ushbu ma'lumotnoma soxta ekanligini G.Nuraliyeva xayoliga ham keltirmagan edi.

Sh.Rajabov esa ushbu soxta ma'lumotnomani iste'molchiga o‘tkazib ketolmadi. U huquqni muhofaza qiluvchi idora xodimlari tomonidan qo‘lga olindi. Tergov jarayonida jinoiy  sherigining qilmishlari ham fosh etildi.

Odil sud Sh.Rajabov hamda Sh.Hayotovga qilmishiga yarasha jazo tayinladi.