Ilyosjon Salomov (ism-familiyalar o‘zgartirilgan) O‘zbekiston tumanidagi mudofaaga ko‘maklashuvchi «Vatanparvar» o‘quv sport-texnika klubi rahbari lavozimida ishlab, o‘ziga yarasha obro‘-e'tibor qozongan edi. Halollik bobida yoshlarga ibrat ko‘rsatish o‘rniga o‘zganing haqiga chang solgani, ellik besh yoshida misqollab yiqqan obro‘sini yelga sovurganidan afsus-nadomat chekayapti. Klub bosh hisobchisi Gavharxon Isomiddinova, xodimlar bo‘limi boshlig‘i Ziyodaxon Ahrorovalar ham ayblariga iqror, qilmishlaridan astoydil pushaymon bo‘lishdi, deb yozmoqda «Huquq» gazetasi.
Ular o‘zaro jinoiy til biriktirib, klubda tahsil olgan o‘quvchilarning naqd to‘lov pullarini bank kassasiga topshirmay, tashkilotning hisob raqamiga kirim qilmasdan, shaxsiy ehtiyojlariga sarflashavergan ekan. Shu taxlitda guruh a'zolari 2013 yilning mart oyidan 2016 yilning noyabrigacha salkam 61 mln so‘m to‘lov pullarini o‘zlashtirishgan.
Ular bu bilan qanoatlanmasdan, ishchi-xodimlarning ish haqi vedomostlariga soxta yozuvlar kiritib, qalbaki hujjatlarni bank muassasasiga taqdim etishadi va ortiqcha ish haqlarini o‘zlarining plastik kartalariga tushirib olishaveradi. Uchovlon 2015 yilning sentabr oyidan 2016 yilning noyabr oyiga qadar 69 mln 611 ming so‘m ish haqi va unga tenglashtirilgan to‘lovlarni noqonuniy ravishda qo‘lga kiritib, o‘z ehtiyojlarini qondirishadi.
Klub rahbari, xodimlar bo‘limi boshlig‘i va bosh hisobchi o‘zganing juda ko‘p miqdordagi, jami 130 mln 600 ming so‘m pul mablag‘larini o‘zlashtirish yo‘li bilan talon-toroj qilishgani tergov jarayonida hujjatli dalillar bilan tasdiqlandi.
Sud I.Salomov, Z.Ahrorova va G.Isomiddinovaning qilmishiga yarasha jazo tayinlab, hukm chiqardi.
