O‘zbekiston tumanida YPX xodimi mashina urib ketishi oqibatida halok bo‘ldi. Kun.uz’ning ikki manbasi holatni tasdiqladi.
Ma’lum bo‘lishicha, YTH 31 iyul kuni tunda sodir bo‘lgan. 30 yoshli shaxs Spark mashinasida 1994 yilda tug‘ilgan YPX xodimi H.K.ni urib ketgan. Bu paytda xodim o‘z xizmat vazifasini bajarayotgan bo‘lgan.
Hodisa guvohlari Spark haydovchisi mast bo‘lganini, u to‘xtash ishorasiga bo‘ysunmasdan qochganini aytmoqda.
“Marhumning 2 nafar farzandi otasiz qoldi. U o‘zi oilada 4 qizdan keyingi yolg‘iz o‘g‘il edi. Viloyat va tumandan IIB xodimlari kelib, janozada qatnashishdi, marhum qoidabuzarni tutishda mardlarcha halok bo‘lganini, uning farzandlari doimiy davlat himoyasiga olinishini aytishdi. Afsus, spirtli ichimlik ta’sirida mashina ruliga o‘tirish bir oilaga mana shunday musibatni olib keldi”, deydi marhumning mahalladoshlaridan biri Kun.uz bilan suhbatda.
YHXX axborot xizmati rahbari Zoyir Yo‘ldoshev Kun.uz so‘roviga javoban “munosabat 10 daqiqada viloyat YHXBning rasmiy kanalida e’lon qilinishini, boshqarma boshlig‘ining ruxsatisiz hatto unga ham ma’lumot berishmasligini” ma’lum qildi. Ammo oradan 2 kun o‘tganiga qaramay, hozircha hodisa yuzasidan rasmiy ma’lumot berilmadi.
