Murodjon Ahmadaliyev professional boksga o‘tdi 

Rio-2016 Olimpiadasi sovrindori Murodjon Axmadaliyev professional boksga o‘tdi. Hozirda ushbu bokschi AQShning Las-Vegas shahrida mashg‘ulotlar olib bormoqda, deb yozadi Sports.uz

– Men kichik qo‘lqoplar taqishni va dubulg‘ani yechishga shoshilayotganim yo‘q. Nokautlar qiroli bo‘lishni istayman. Ko‘pchilik ko‘rgan bo‘lsa, men doim raqiblarimga bosim uyushtirishga harakat qilaman. Menda eng kuchlilar safida bo‘lish ishonchi bor. Ayniqsa, yarim yengil vazn toifasida mening tanam kuchli ko‘rinadi. Qachonki, raqibimdan ustunligimni ko‘rsam, jangni tugatish uchun bosimni kuchaytiraman, – degan Ahmadaliyev BoxingScene nashriga bergan intervyusida.

Ayni damda Ahmadaliyev Jastin Gamber murabbiyligi ostida shug‘ullanmoqda. Bu murabbiy o‘rta vazn toifasida yengilmas Kaleb “Sweethands” Plantga (16-0, 11 nokaut) ustozlik qilgani bilan boks olamiga mashhur.

– Ahmadaliyev bilan o‘tkazilgan qo‘l jangidan so‘ng men uning qanday kuchga ega ekanligini tushundim. Bu bola kuchli elektr kuchiga ega, – deydi Jastin Gamber. – Uning havaskorlar boksidagi yaxshigina tajribasidan kelib chiqib, men Ahmadaliyevning yarim yengil vazn toifasiga to‘g‘ridan to‘g‘ri ta'sir qilishini his qilyapman.

Eslatib o‘tamiz, 23 yoshli Murodjon havaskorlar boksida 2015 yil Dohada o‘tgan Osiyo chempionatida kumush, 2017 yil Toshkentdagi Osiyo chempionatida oltin medalni qo‘lga kiritgan.